Jowai: Ka seiñ Khasi Jaiñtia National Union (KJNU), da dawa ko na ki bor wa hajrong wa pait ya ki tnat sorkar waphær waphær wow kyrriah kaam noh ya ki sahep kiwa da kreh palat le snem ha i jooh i thaw neibhah ini man i pyrchah ya ki kyndon aiñ.
Ka seiñ da e nongmuna ko ya u sahep ka Divisional Soil and Water Conservation Officer, Jowai Territorial Division uwa da kreh la kamwa 5 snem ha ini i thaw kattu.
Da kam ka seiñ leh wa uni u sahep da yoh u ya ka Transfer Order ha ka 01.05.17 wow lai kreh noh cha iwi i thaw. “Nga kwah O u kylli na ka sorkar wa neiyi i daw wa hadooh katni leh dang neh u wei iyi wa em cha kylla wym lai kreh u katkam wa da phah” da ong u president ka seiñ u N.N. Shadap.
Chooh Chooh da ong u wa ki sahep ki wym em ya i kyrchaan na kiwa mihkhmat paidbah chisien wa da wan ka hukum wow kyrriah da haap mih wei du hadien chi sngi da wan chimkti da kiwi tawon.
Ini toh i buit san snem kiwa mih khmat wow pynneh ya ki sahep kiwa em neiliang yong ki khnang wow suk ki u pynbiej ya ki paidbah wa pli.
Khadooh ka seiñ da ong wa ki aiñ hi man ki i jooh ymtoh wow khia chilliang ka pyrla neibhah ki aiñ sorkar toh u man ki salonsar.
Discussion about this post