Da biang ki sabut wow pynchitom ya ki dkhot ka KSU: DC Ri-Bhoi

Nongpoh: U DC ka Ri-bhoi District da pynkrehkaam u da ka Section 144 CrPC neidaw wa pynmih awri awra ki dkhot ka KSU kiwa em kamwa 150 ngut, kiwa kynthup ya ki dkhot na Central Body wa na North Khasi Hills Unit kiwa kam toh kiwa mihkhmat ya ka Ri-bhoi District heiwa ynnin ka sngi da thang da tympiah tympra ki ya ki truck hei thaw chna ya ka Railway Station ha Ronghona iwa em ha ki thaiñ Byrnihat.

U DC da ong u wa ini i leh ki dkhot ka KSU da wanrah ko i duhnong wa joor bha ya ini i thaw sorkar.

Da pyntip u leh wa kini ki dkhot ka KSU da dat ki ya kiwa kreh ha ini i thaw hadooh da em kiwa mynsoo joor bha wei da tba kti ki leh ya ki pulit wa da booh ha ini i thaw.

Da em leh ki kattu katni ngut ki dkhot ka KSU kiwa da mut wow khang ya ka sarok bah deiwa thang diñ ha Shang Bangla wei kini ki jooh da dat won ki sa ya ki pulit manda ksoh ki pulit ki heipor wa mih ki na ini i thaw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hadien ini da wanrah ya kiwa yahkhmat ka KSU wa ki dkhot cha Nongpoh Police Station yow pynman ya ka takit tangwa kiwa yahkhmat ka KSU da kyntait biang ki ya ka hukum ki pulit wa ki Magistrate wei da maham ki ki wei da khanglaad ki leh wow leh yei kaam yong ki.

U DC leh da ong u wa da biang ki sabut wow pynyoo wa emkti ki dkhot ka KSU wow wanrah yei ma ya ki paidbah kamjooh wow pynchlur ya kiwi wow tynkheiñ aiñ.

Kamtæ u DC da rai u wow pynkrehkaam noh da ka Section 144 ka CrPC wow khang ya kiwon kiwon wym hoi u yalang ki ha chi thaw palat ya 5 ngut lait noh ha ki thaw puræ wei ym hoi u rah ya ki tiar pynmynsoo. Kani ka hukum u krehkaam ko nadooh ynne ka sngi.

Also Read: Chah hiar thma ka thaw kreh ka North Eastern Railway wa em ha Ri-bhoi District