Jowai: Ka Jingiaseng Samla Balang Presbyterian Jowai, Social Committee kam chibynta wow leh warom ki ya ka World Environment Day, ynne ka sngi da pynman ki ya ka yalang pynsñiawthooh ha Mission Compound Indoor Sports Hall chaphang ka Bei Rymaw heiwa emkaam wow yada ya ka.
U Chairman ka Social Committee u D. Passah hei klam waiphang yong oo da ong u wa ka Bei Rymaw katni toh kawa kjut kawa da thiah hapoh ICU wei lada ym khyrngiat daw haap rah ka cha ka ICCU.
U TBn. B.L. Khonglah da ong u wa kani ka Social Committee da dep pyrchang ko man u snem u leh warom ya ka World Environment Day deiwa pynkhooid ya ka wah Myntu, ki thung dieñ wa kiwi kiwi de ki kaam.
U bru chemphang ha kani ka sngi toh u James Pohsngap DFO, Forest Utilization Division, Shillong, Meghalaya da ong u wa i kamraam yong u bru wow yada ya ka rymaw wa waroh wa em ha ka, da thoh leh ha ka Bible heiwa u blai da booh ya u bru kam u sordar yow chare ya ki mrad kamjooh ki khloo ki kjam.
Tangwa u bru katni da leh u mar chawa yoo heiwa da lut ki loom da man bih ki um. Waroh kiwa em ha ka rymaw toh kiwa emkaam nadooh ki khniang, ki sim, ki pseiñ neibhah lada wiar jait uwi daw boon jait du uwi. Da e nongmuna u lada wiar lut ki sim, ki khniang wow baam ya ki kba ki jhoor daw boon ki wei kamjooh pyndooh ja ko ya i ki bru.
Da klam u leh chaphang ka “Global Warming” wei da ong u wa katkam i chem ki stat sayan ini daw kthah ko hadooh i thiah i dem ki bru heiwa daw chitom ki u yoh thiah du nei kylla i chit i kjam.
Ha ka 10 tarik won uni u bnai ka Social Committee leh daw li thung dieñ ko cha loom tlep bru ka Balang Presbyterian Jowai.
Discussion about this post