Jowai: Hadien wa pynbna u DC ka West Jaiñtia Hills District wa emkaam u yoh NOC chwa wow tem ya ki sur ki rwai yong kiwi ki bru (Copyrighted Music) na ka company wa tip kam ka Phonographic Performance Ltd. wa da tipmit da ka sorkar, da mih boon ki bru wa kylli yeini.
Kamtæ neilaing u Wyrta u pyrchang i u pynche cha phi hei yatoh wa ki kattu katni ki phang hei yatoh wa ini waroh.
Hapoh ka ri India ki kot ki sla, ki rwai, ki sur da yada ya ki hapoh ka aiñ wa tip kam ka Copyright Act, 1957. I thmu yong kani ka aiñ toh wow yada yei hok ki tre yow lait kiwi ki bru u chna poisa lyngba ki sur, ki rwai wa kiwi kiwi khlem yoh bor na ki tre. Ya kiwa leh pyrchah ya kani ka aiñ ye ki u chahkset hadooh 3 snem namo chah daiñ kuna hadooh T. 2,00,000.
Heni i por u pynche i du chaphang ki rwai wa ki sur. Ki bru wa pynmih ya ki thup rwai boon toh kiwa pynmih hapoh ki “Recording Label” namo ki company wa leh ya ki recording wa kiwa pyllai yaaw ya ki wei da pynmih ya ki thup rwai hei pyrtuid kiwa rwai namo ki dhab tem tangwa i pyrtuid ka Recording Label leh emlang ki.
Em ki por i hok yong kini ki sur wa ki rwai (Copyright) da chim kini ki Recording Label wei ya kiwa rwai won da su ya ki da ka Royalty kiwa mih na kiwi kiwa pynemkaam ya ki sur wa ki rwai yong ki.
Kini ki Recording Label toh kiwa da tipmit da ka sorkar wei da man ki leh ki dkhot ka Phonographic Performance Ltd.
Kamwa man kattæ neini cha khmat lada pynman fete heipor paan bor na u DC daw e bor u pynman kamwa jooh tangwa daw booh sa iwi i kyndon wow phah ya kiwa pynman ya ka Fete wow chim NOC na ka Phonographic Performance Ltd. kawa em yungkrehkaam leh ha Shillong chwa wow tem ya ki sur ki rwai hapoh ka Fete.
Heipor wa paan NOC haap pyntip cha ka Phonographic Performance Ltd. wa katwon ka bai psiah cha ka fete, katwon yoh sponsorship lada yoh, wa katwon ngut ki bru yooluti wa daw wan cha kani ka Fete wei chong ha ini waroh daw kheiñ yei dor ka NOC.
Lada ka Fete toh ka wow pymih poisa (Fundraiser) neibynta ki skur, ki hospital wa kiwi kiwi daw pynduna leh ya ka bai NOC.
Tangwa lada ka tem ka put ymtoh ka wow pynmih poisa kawa mynkna ya ki paidbah wa wan paitke ki, wei kiwa pynman ym yoh poisa ki iyi iyi leh, ym emkaam ya ka NOC.
Heipor wa paan ya ka NOC ym emkaam u pyntip ya ki jait sur jait rwai wa daw tem neibhah lada ha ka Fete da tem du ki rwai phareng ka bai NOC daw lai ko cha ki Recording Label wa em ha India wei kamjooh ki dkhot ka Phonographic Performance Ltd. wa em ha kylleiñ ka pyrthai wa em hadooh 65,000 kiwa rwai/dhab wa 10,000 ki Recording Label kawa su ki chisien chisnem cha ki.
Na ka bai NOC 15% u chim ka Phonographic Performance Ltd. wei kawa tam u lai ko cha ki Recording Label wa ki tre sur.
Lada ya ki thup rwai da pynmih da ki bru samen ki wym toh ki dkhot ka Phonographic Performance Ltd. ki ym yoh ki ya ka poisa naka tangwa ya ki rwai yong ki da yada da ka aiñ Copyright Act, 1957.
Kani ka Copyright Act, 1957 leh krehkaam ko chadooh ki Restaurant, ki Club wa kiwi ki thaw wa tem sur yow pynmih poisa wei ya ki haap su ki chisien chi snem. Ki Radio Station wa tem sur haap leh ki kamjooh.
Discussion about this post