Daw yakhun ka BJP na waroh ki 60 tylli ki Constituency ha kani ka Election MLA 2018

Shillong: “Ka seiñ BJP ym emkaam de ko wow klam pynche hajrong i kaam doh masi neibhah wa u Dr. Mukul Sangma da dep yarap u wow pynche yeini” da ong u president ka BJP Meghalaya State Unit, u Shibun Lyngdoh hawa yaklam wa kiwa pathai khubor ynne ka sngi ha Shillong.

Da ong u wa da yoo ha ki khubor wa u Dr. Mukul da pynche u hajrong ini i bynta wei ini i pynche u Montri Rangbah ka jylla daw yarap pynche ko ya ki paidbah.

Hei yatoh wa i pynbaad u Dr. Mukul ya u Nalin Kohli kam u wa paitke hi-eh, neiliang u Shibun da ong u wa u Dr. Mukul ye u wow man kam uwa yalehke ha iwon iwon i bynta ka saiñ pyrthai tangwa ki kaam yong ka sorkar yong oo da klam che ko neibhah wa man ko ka wymhoi hiwot.

Da ong u leh wa u man i iwa miat lada u Dr. Mukul u pynbait sngi u wow yania wa u Nalin Kohli wei daw kyntu u leh ya u Kohli wow yania wa u Gourav Gogoi hajrong i man i long ka jylla Meghalaya heipor wa synchaar ka Congress.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Hei yatoh won wa i klam u Dr. Mukul Sangma wa i yapynbait hapyrdi ki ar seiñ, ka United Democratic Party (UDP) wa ka Hills State People Democratic Party (HSPDP) daw wai laad ko ya ka BJP wow psiah nadien chyngkiar cha ka jylla Meghalaya, neiliang u Shibun da ong u wa ka BJP da klam che ko wa daw yakhun ko na waroh ki 60 tylli ki Constituency hapoh ka jylla ha kani ka Election 2018.

Chooh chooh u Shibun da ong u “ka BJP ym emkaam ko wow psiah nadien næ nakhmat tangwa da rai skem ko wow yaleh ko samen na waroh ki Constituency ha ka Election MLA 2018”.