Jowai: Ka seiñ National People’s Party (NPP) kam chibynta wow pynyaar wei wow pynjanai ya ka seiñ, ynne ka sngi da pdiangburom ko ya ar ngut ki waheh na Jowai kiwa kynthup ya u Philemon Lyngdoh wa u J.G. Kyndiah ha ka yalang wa pynman ha pchem ka Jaiñtia Secondary School, Jowai.
U Philemon toh uwa jooh man kam u MDC ka JHADC ar sien wei da ong u wa i daw wa psiah u cha kani ka seiñ toh wa kwah u wow kreh yow wanrah ya i roi i paar ha ri-loom Jaiñtia wa ka jylla waroh kawi neibhah katkam wa man katni ka sorkar ymye ko u leh yeini waroh.
“Kani ka seiñ (NPP) hanla man ko ka seiñ ri-loom tangwa booh thong won ko wow yada wei wow kreh ya ki jaitbru khian paaid neibhah ymdu ha Meghalaya tangwa ha kylleiñ ka ri wei da em MLA ko leh cha kiwi ki jylla kam ha Manipur wa Rajasthan” da ong u Lyngdoh.
Neiliang u JG Kyndiah won uwa jooh man kam u District President ka BJP da ong u wa i daw wa kongsan hi wa mih u na ka BJP wei wow psiah cha ka NPP toh wa chem u wa rap suk u yoh u yaklam wa ki heh ka party ymtoh kamwa man kiwi heiwa haap yaklam boon kyrdan (protocol) uwi hadien uwi yow yoh u yaklam wa ki heh.
Da ong chooh chooh u wa da mih u na ka seiñ toh neidaw wa ka BJP ymtoh kawa ye u chaniah neibhah kular ko deiwi katwa leh won ko deiwi kamwa da yoo wa jia i ha kiwi tawon ki jylla ka ri.
Neiliang u State President ka seiñ u Dr. W.R. Kharluki da ong u wa ka seiñ kreh ko nadooh madan na ki paidbah wei booh thong ko wow kreh neibynta ki jaitbru khian paaid.
Heijooh i por da ong u wa ka seiñ ympu em u rai ko wow yakreh wa kawon kawon ka seiñ kani ka MLA election 2018 wei daw pynyieñ kyrtong ko ha pyn 60 tylli ki constituency.
Da ong u leh wa iwa kongsan dooh wow wnrah yei kylla hapoh jylla toh i wow khooid i rukom krehkaam nadooh u Montri Rangbah hadooh ki Montri yong oo yow man ki kam ka nongmuna ya ki sahep wa kiwi kiwi.
Discussion about this post