Khlem ka Congress ym ye ki u pynhaap ya ka EC ka KHADC: Pynshngain

Shillong: Hadien wa yoh ya ka chithi wa soi da ki 7 ngut ki MDC wa da dam ki u kyrchaan ya ka PDF neiliang u Pynshngain N. Syiem da khut jhan u ya ka yalang yow pynche yeiwa jia ynne ka miet.

Hawa yaklam u wa kiwa pathai khubor, u CEM ka KHADC da kop u wa i thmu wow pynhaap ya ka Executive Committee yong ka PDF kawa toh kawa ym ye u man neibhah em ki MDC wa soi pyrtuid ha ka chithi wow dam noh u kyrchaan ya ka PDF daw kyruiñ dien ki.

U Pynshngain da ong u leh wa daw pteiñ u kam u CEM neibhah ki seiñ ri-loom ymbien ki u ya krehlang wa ka Congress wei ym ye ki u pynhaap ya oo.

“Nga da pdiang O ya ka chithi wa da soi da ki MDC ka HSPDP, KHNAM wa UDP wa ki da dam ki u kyrchaan ya nga, wei sñiaw phylla O wa ki ym em daw ki wow leh yeini,” da ong u Pynshngain.

Related posts

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Pdiang ka sorkar yei pynche u Sniawbhalang, ki wym hun ye ki wow lai tih chooh: Prestone

May 21, 2025

Da ong u leh wa ym yaklam u yei boon paaid wei u klam u katkam ka kyndon ka Assam Autonomous District Council Rules wa ong wa kam u CEM u neh bait u. “Yow pynhaap ya ka EC haap wanrah ki ya ka No Confidence Motion tangwa kammon u leh ki yeini lada ym krehlang ki waka Congress,” da kop u Pynshngain.

Da ong u leh wa ka EC ka PDF wa daw pynman mynstep u lai bait ko wei lada ym krehlang ki seiñ ri-loom waka Congress ym ye ki u pynhaap ya ka EC.