Shillong: Ka seiñ Congress ha kani ka jylla ye biang ko u yachem moochynthut wei ye ko u piah phrai næ chwa ka Election MLA 2018, neibhah wa katkam ka khubor wa tikna kamwa 10 ngut ki MLA yong ka da khreh ki wow mih noh naka wow lai yakhun na ka party National People’s Party (NPP) wa na kiwi tawon ki party.
Ka khubor wa da yoh da ong wa ki MLA ka Congress kiwa kynthup ya ki montri ha ka sorkar MUA-II daw mih noh ki ha ki ka kattu katni bnai chwa ka Election MLA.
Ki kattu katni ngut kiwa daw mih noh kynthup ki ya ki montri kam u Prestone Tynsong uwa da thrang wow ksoh ya ka chukri Montri Rangbah, u Sniawbhalang Dhar, u Ngaitlang Dhar, u Kennedy C Khyriem, u Martin M Danggo, u AL Hek, u Dr. Celestine Lyngdoh wa ki kattu katni ngut ki MLA samen ki wow psiah noh cha ka NPP, BJP, UDP wa kiwi kiwi.
Katkam ka khubor, kini ki MLA wa katni da antaad ki wa ka Congress ym poi de ko heibor ha u 2018 wei kwah ki u thooh thaw thymme noh yow synchaar slem wei da chem ki wa ka NPP kawa khlan cha Garo Hills, daw wan ko hei bor deiwa jop sa kattu katni ngut na Khasi wa Jaiñtia Hills.
U Sniawbhalang Dhar dang ha ini i por wa da dep da chah pynbaad u ha ka Jowai Congress wa da thmu u wow pynyieñ da u boo yong oo wow yaleh pyrchah ya u Dr. RC Laloo, katwa u Prestone Tynsong won da pynsñiaw u yei wym sñiawsuk u yei kam ka Meghalaya Pradesh Youth Congress wa u Mukul Sangma u pteiñ u kam u wa yahkhmat ka party ha u 2018.
Hei yaklam won wa kini ki MLA wa kini ki Montri ka sorkar da kyntait ki yeini wei da kam ki wa dang em ki ha ka Congress wei kani waroh toh ka khubor hamsaya.
Tangwa ha kawi won ka khubor ka NPP da kam ko wa da em chibooon ki MLA ka Congress kiwa da phah ktien cha ka seiñ tangwa ympu em u rai ko hei yatoh wa ini.
Chirup wa ki MLA ka Congress kiwa kwah wow psiah cha ka NPP, da yoh khubor leh wa ong wa em kiwa thmu wow lai cha ka BJP, tangwa ympu kwah ki u pynmih pyrthai yeini waroh.
Discussion about this post