Ha u CEM ka JHADC thoh ka JIPD wow yada ya ka Myntdu wa kiwi ki wah ha Jaiñtia Hills

Jowai: Ynne ka sngi ka dhab wa tip kam ka Jaiñtia Indigenous People’s Dorbar (JIPD) hapoh i yahkhmat u Chairman wa u Secretary yong ka u JG Kyndiah wa u CH Passah da lai yachem ko ya u CEM ka JHADC u Thombor Shiwat ha kamra krehkaam yong oo.

U Kyndiah da batai u chaphang i thmu wei angnood ka JIPD kawa da seiñ da ki bru wa em i bahkhlieh neibynta ka jaitbru heiwa ka em ki dkhot kiwa kynthup ya ki muktiar, ki professor, ki bru chemphang, ki bru wa kreh neibynta ka imlang sahlang, wa kiwi kiwi.

Ha kani ka yachem da ekti leh ya ka dorkhat ha u CEM heiwa da kyrpaad wow chimkhia ka JHADC heiyatoh wow yada ya ka wah Myntdu wa kiwi ki wah hapoh ri-loom Jaiñtia.

Ka Dorbar da ong ko wa hadien wa pynmih hukum ka NGT hei yatoh wa ka Wah Myntdu, da phah ko ya ka sorkar wow thooh ki laad wow yada ya ka Myntdu wei ki bor District won ha ka yalang wa da man ha ka 31 tarik u Naisan da ekti ya ki kattu katni ki bynta cha ka JHADC wow leh ko.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Kamtæ hei yatoh wa ini ka Dorbar da booh ko ya ki kattu katni ki mat haphrang ka JHADC kiwa kynthup kamni hawah :-

1. Wow phah khang ya waroh ki jait kreh næ jait chna harood ka wah Myntdu wei wow chah ya ki u pteiñ yei chna hadien wa da dep chna kyndon wa ki aiñ ka Council.
2. Wow khut ya ka Emergency Meeting yong ka Executive Committee yow pyrkhat kammon wow yada ya ka wah Myntdu wa kiwi ki wah hapoh ri-loom Jaiñtia.
3. Yow pynchitom ya kiwa leh pyrchah ya ki hukum ka Council, wa kiwi kiwi.

Ha ini i yachem da em leh u Chairman ka JHADC u A.H Darnei, ki Executive Member ka Council kam u P. Tangliang, u Lasky Rymbai, wa kiwi kiwi.

Neiliang u CEM ka Council da pyntip u wa katni dang chna ya kam kani ka aiñ wow yada ya ki wah wei da kular u wow pynmih ya ka hukum ha kini ki sngi wow wan heiyatoh wa ini waroh.