Jowai: Ka seiñ Jaiñtia Students’ Union (JSU) hapoh i yahkhmat u President u Rikut Pareiñ, u Lawyerson War kam u Working President u General Secretary Jersom Shylla wa kiwi kiwi ki dkhot ynne ka sngi da lai pait ki ya ka B.Ed College wa em ha Mynthong Jowai kawa da booh moo yurim nadooh u snem 2012.
“Ini i lai pait i toh chibynta wow booddien yeini neibhah wa katkam wa kular u Dr. RC Laloo heipor wa dang man u kam u Education Minister wei da toh u sdang noh nadooh u 2016 tangwa hadooh wa man katni ympu sdang yeini waroh” da ong u R. Parein, President JSU.
Da pynsñiaw leh yei mynsien wa khia neibhah hadooh katni ympu em u sdang ya kani ka thaw sikai kawa emkaam neibhah wa katkam ka kyndon sorkar emkaam kiwa sikai wow pyndep ya ka D.El.Ed namo ka B.Ed.
“Iwa sñiawsih toh wa ha ri-loom Jaiñtia em du kawi ka thaw pynpliah (Training) kawi ha Thadlaskein kawa tip kam ka ITI kawa ye u pdiang du kajiak ngut ki khynnah” da ong ka seiñ.
Chooh chooh nei slem ka sorkar wow wai ya kani ka thaw sikai da man pathan ko ka thaw wa pynemkaam bakla ki damok ya ki kaam wym man neibhah da chem ya ki dendrite, ki kot yabrut, wa kiwi kiwi wei da chem leh ya ki tylla wa da chah tympiah ha ki dwar wow psiah cha kani ka thaw wa ki kamra.
Kamtæ da kyntu joor ya ka sorkar wow wai noh ya kani ka thaw sikai chwa wow man ko ka thaw ki bru wa chim kabu.
Discussion about this post