Williamnagar: Emkaam i sñiaw chngaiñ i wym em i tieñ na ki kaam wa sih ha ka imlang sahlang iwa wan ha khmat dooh chwa wow ye u wanrah ya i roi i paar da ong u Montri Rangbah ka jylla u Dr. Mukul Sangma heipor wa wai u ya ka Chiading Police Station ha East Garo Hills ynnin ka 4 tarik.
Kani ka Police Station wa thymme u pait ko ya 79 tylli ki chnong wa kynthup ya ka Samanda Block Headquarter kiwa nachwa em ki hapoh ka Songsak wa Williamnagar Police Station. Ha chwa wow pynmih ya kani ka Police Station ym em tang kawi leh ka kari pulit wa pait ya u sarok nadooh Jengal hadooh Songsak.
U Dr. Mukul da kular u leh ya ki paidbah kani ka thaiñ wa daw poi kiwa boon ki kaam pynroi neidaw wa em ka Police Station, ki Bank leh daw wan ki wow wai ya ki thaw kreh ki yow lait ki paidbah u lai chadooh cha Williamnagar ya ki kaam Bank.
Da pynche u leh hei yatoh wa i rukom thung kreh pulit iwa dang lai cha khmat hadooh katni heiwa da ong u wa ym elaad wow leh chilliang namo u pynchna ya ki marks kiwa yakhun kreh, kamtæ kiwa wan na ki yung wa dooh wa duk leh em ki ka jooh ka laad wow yoh kreh. Da ong u leh wa ka sorkar daw khut kreh chooh ko neini cha khmat yow laad chooh ki khynroo khyllood u kreh kaam pulit.
Da ong u leh wa ki pulit i kaam yong ki ymtoh du wow kem ya kiwa tyngkheiñ aiñ iwa emkaam u leh ki leh toh wow pynsñiaw yajan wa ki paidbah u pynsñiawthooh ya ki chaphang ka aiñ wei wa emkaam wow bood ya ka.
Da ong u leh wa ka sorkar daw chna ko ya ki yaaw ha ki thaw pynsangeh ki truck ki kari (Lay bye) wei kawi kam kani ka yaaw da dep e bor wow chna ha Chiading.
Discussion about this post