Jowai: U Innocent Shadap uwa chong wa sah ha Ummulong da chim u ya ka rai wow man kam uwi na ki kyrtong wow yahun Election MLA naka 1-Nartiang Assembly Constituency hadien wa da lai luti u da boon snem kam u khynroo uwa da kreh chiboon ki kaam imlang sahlang hapoh ka chnong ka thaw wei da chem u samen yei eh i khoo ki paidbah hapoh ka Constituency.
U Innocent da ong u ki dooh khih ki khynroo khyllood, i chah yooh beiñ ki kup chilliang sem chilliang kam kiwa rep, i wym ye ka sorkar wow chna aiñ wa kyrpang wow yada ya ki khian paaid ki khon Khasi Pnar, i booh teiñ ka sorkar wow pynmih ya ka C&RD Block waka Civil Sub-Division ha Namdong kawa man u thied snaam ka Constituency, i ieh beiñ ka sorkar wow pynbha ya ki PHC, CHC khamtam ka CHC ha Ummulong wow pynku kyrdan ya ka cha ka Civil Hospital wa pura kamjooh wow kyntu ya ki kaam yalehke (Games & Sports) toh ki daw wa pynman ya oo wow chim ya ka rai wow yakhun Election MLA ha u 2018.
U Innocent Shadap uwa jooh khut leh kam u Sanjoy da ong u leh da rai kut u wow yieñ yaleh Election wow yasaid hapoh ka Assembly wei lada poi u ha i jop daw pyrchang u wow kreh nadooh na mynsien yei bha ka Constituency khamtam ya ki para ri wa ka jaitbru.
Hei yatoh won waka Party u Shadap da ong u wa daw jied u daka wa kyrchaan ya ka jaitbru. Kamtæ da kyrpaad u ya ki paaid ka 1-Nartiang wow kyrchaan ya oo yow poi cha ka thong wow jop.
Discussion about this post