Shillong: Ka Meghalaya Residents Safety and Security Acts, 2016 (Entry & Exit Point) ymtoh ka dawai kawa ye u pynchait pynkhiah yei kjut yei psiah i mih ki baarjylla (Influx) wa em ha ka jaitbru u Ynñiawtrep, da ong ka Hynniewtrep Youth Council, lyngba u General Secretary, u Robertjune Kharjahrin.
Ka HYC ym pdiang ko da lei lei leh ya ka aiñ Meghalaya Residents Safety and Security Acts, 2016 kawa chna da ka Sorkar MUA-II hapoh i yahkhmat u Dr. Mukul Sangma wei da ong ki wa kani ka aiñ toh thij kam i baam wa chet khlem ih kam i baam wa da pyut iwa lada baam i daw pynsih kpoh ko i.
Ka seiñ ym pdiang ko ya kani ka aiñ yow elaad u wan ka rel kamjooh da ong ko leh wow pynmih ya ki Entry/Exit (Ki thaw psiah thaw mih ki baarjylla) ya ka Immigrants Facilitation Centre (Ka thaw yarap ya ki baarjylla wow psiah ki cha ka jylla) wa ki kyndon hei yatoh wa kiwa chong wai.
Katkam wa ong u Robert, nei puræ ya ka Meghalaya Residents Safety and Security Acts, 2016 da sñiawthooh wa katkam kani ka aiñ waroh ki tre yung kiwa thmu wow e wai haap paan bor chwa ki naka District Task Force wei haap pynsakhiat ki wa neiwon ki kiwa chong wai deiwa rah ya ki EPIC namo ki Ration Card yong kiwa chongwai deilang wa i dur yong ki wa ki kot ki sla yong ki thaw wa jooh sah ki nachwa. Lada toh ki khynnah lai puræ haap lai pynsakhiat ha khmat ka District Task Force wa ki pulit wei lada ym leh ki ya ini daw chah pyndain kuna ki T. 1000. Kiwa chong wai kiwa toh ki tre chnong leh haap leh ki kamni i jooh.
Kini ki kyndon ki ym em bor ki wow khanglaad ya kiwa chongwai kamjooh ki kaam sih wa mih.
Hei yatoh won wa ki Entry/Exit Point, ka seiñ ong ko wa ym ye ka sorkar wow ong ya ki baarjylla wow psiah u mih ki neini nei tai neibhah kiwa psiah hi cha poh ka jylla daw chem thaw ki da kiwi ki laad ki luti.
Ya ki Facilitation Centre won ka seiñ da ong ko kani pathan pdiang wei yada ko ya ki baarjylla wei da pdiang bait ko ya waroh kiwa man ki tre ri India.
Ka seiñ da ong ko wa du ka ILP wa ye u pait yei psiah i mih ki baarjylla ym toh da ki aiñ wa khlem lamieñ. Ka ILP da khanglaad ko chwa wow psiah cha ka jylla ki wym biang ya ki kot ki sla ym toh deiwa elaad u psiah ki neitæ u pynsakhiat won hadien.
Ka seiñ leh ong ko wa emkaam ki aiñ wa khlan wow pait yei yoh ki baarjylla u seiñ khih laitlan, ki Work Permit kiwa khlan bor kiwa kdoh ya kiwa kreh yow lait ki u kreh palat yei por wa da e ya ki, u pynkhlan ya ki aiñ Benami yow lait ki tre ri u pynchah pyrtuid ya ki baarjylla wa kiwi kiwi de.
Kani toh ka khubor naka HYC chwa wow pynman ya ka yalang wa khut da u Montri Rangbah, u Dr. Mukul Sangma ya ki 13 tylli ki seiñbhalang ynne ka sngi wow yaklam yei chna ya ki Entry/Exit Point kamjooh ka luti rel.
Discussion about this post