Shillong: Ka Hynniewtrep Youth Council (HYC), da pdiang sñiawbha ko ya u Montri Rangbah ka jylla, u Dr. Mukul Sangma heipor wa wan booh mooyurim u ya ka Mawlai C&RD block deiwa dawa ya ki 14 tylli ki phang wa da dep booh dorkhat ko nadooh ka 23 tarik u Thohlakhmi (Feb) uni u snem.
Ha kani ka sngi neiliang ka HYC Mawlai Circle da pynsñiaw ki leh yei kwah ki u pynkrehkaam bait ya ka Inner Line Permit (ILP) kam ka laad wow yada nei wan psiah ki bru na baar jylla ka phang wa ha khmat dooh wa dawa ka seiñ.
Hawa yaklam wa ki wa pathai khubor, u President ka HYC Mawlai, u Donboklang Kharlyngdoh da ong u wa ka seiñ ka sñiaw ngooh ko ya u Montri Rangbah wa da chim khia wow pynyoh yei angnood ki paidbah ka chnong Mawlai yow yoh ka Block yong ki wa yei pynkha u leh sa kawi ha Mawpat.
Tangwa ka seiñ won u pteiñ hi ko wow dawa na ka sorkar neibynta ka jaitbru wow pyrnkrehkaam ya ka ILP kawi na ki 14 tylli ki phang wa dawa ka seiñ kamjooh wow pynbait pood wa ka jylla Assam.
Uni wa yahkhmat ka HYC da ong u wa ka aiñ Meghlaya Residents Safety & Security Act toh ka wym em lamieñ neibhah kani ka aiñ ym ye ko u khang yei psiah i mih ki baarjylla.
Ka HYC seiñbei da khut yaklam ko ya ki Montri ka sorkar MUA-II hajrong ka phang ILP ha ka 22 tarik uni u bnai kawa daw pynman ha Khasi National Dorbar Hall, Mawkhar tangwa neiliang ka sorkar ympu em jubab ko ya ka seiñ.
“I khut i ya ki Montri sorkar khamtam kiwa thmu wow mih noh na ka party Congress wow wan chimbynta ki ha katai ka ya phyllu yumut hajrong ka ILP”, ong u Donbok.
Discussion about this post