Jowai: Kat dang lai ki por ki bru samen klam ki yeiwa emkaam u kyntu kynrong ya ka jylla waroh kawi hei wow myntoi waroh salonsar lada em kiwa mihkhmat kiwa kreh dei hok.
Ha kani ka kynti da mih ka dhab yong ki bru samen wa sñiawkhia yeini waroh wei da tip ya kani ka dhab kam ka Meghalya Movement ka wow pynsñiawthooh paidbah yeiwa emkaam wow man ka kaam jied mihkhmat kawa khooid ha ka Election 2018.
U Baitlang Pohsngap uwa man kam u Convenor ka Meghalaya Movement da ong u wa emkaam u mih khmat ki bru wa em i mynsien wa sakhiat wa i sap ha synchaar khadar wa i thrang wow chakri hok neibynta ka ri wa ka jaitbru.
Da khut u ya ki bru samen wow wan ki cha khmat ymtoh de u rieh ki wei da toh i por wow wanrah yei kylla hapoh ka jylla.
Da ong wa i daw wa sdang ya kani ka Meghalaya Movement toh wa da kot da kdang yei rukom synchaar hapoh ka jylla hadooh wa da chah leh beiñ ware ki tre ri ha kiwa boon ki liang katwa dang lai ki sngi wei kiwa mihkhmat pynlut por ki du wow yaknieh chuki.
Hei sakhiat ka jied ya kiwa mihkhmat ka synchaar khadar toh u man ko kawa khooid ymtoh da i bor poisa donhi iwa man pyrchah ya ki kyndon ka Election Commission ka ri India. Chooh chooh sñiawsih wow ong wa ha ki por election ym em wa klam chaphang i stat wa i thong u kyrtong wei da krehkaam du ka spah yong oo wow thied ya ki Vote.
Kamtæ ka Meghalaya Movement da khut lang ko ya waroh wow ya emlang ha ka yalang paidbah ka seiñ ha ka 8 tarik uni u bnai ha Iawmusiang, Jowai heipor 10:00 waje i step.
Neiliang u convenor ka seiñ u Baitlang da ong u wa kani ka seiñ toh ka seiñ kawa laitlooid kawa ym em yatoh wa kawon kawon ka seiñ pyrthai, tangwa i thong yong ka toh wow wanrah yei kylla deiwa embynta ki paidbah kamjooh wow kyrsu ya ki bru samen wa ye hi ki u yahkhmat hanlada ym em pisa ki leh.
Discussion about this post