Jowai: Ka seiñ Synjuk ki Waheh Shnong Jowai ynne ka sngi dalai yachem ki ya u Deputy Commissioner ka West Jaiñtia Hills District u R. Rapthap wow yaklam hajrong ar tylli i eh i khoo iwa kynthup yei pynman ya ki Fete neidaw wa heh i su hadien wa krehkaam ka GST, iwa ar won toh wow pynyinsur yei jngai i tei harood ka wah Myntdu wei da kyrpaad wow thooh ki laad ki luti neibynta wow chna ya ki thaw pyntooid jakhlia ki paidbah khnang wym tooid jakhlia cha kani ka wah.
Hei yatoh won wei pynman ya ki Fete da ong ki wa dei langær ki Dorbar Chnong ha Jowai pynman ki ya ki Fete wa ki khle nasib du neidaw wow pynmih poisa wow chna skur, ki yungwalieh, ki madan yalehke, wa kiwi ki kaam neibynta ki paidbah du neidaw wa i yarap poisa na ka sorkar ymtoh man i iwa dap wow pynbiang yeiwa emkaam yong ki wei khlem yohbor na u DC haap yoh ki sa ya ka Clearance Certificate na ka Tnat Sale Tax.
Da pynsñiaw ki wa ha uni u snem won manda lai ki cha Sale Tax haap su ki ya ka dan nalor kiwi tawon khnang wow yoh ya kani ka Clearance Certificate deiwa sñiaw diaw wa ka tnat Sale Tax ym ye de ko u leh ya kani ka bynta neibhah wada pynkrehkaam ya ka GST, iwa mut wa haap su ki hei dor wa heh deiwa pynrap leh wa kani toh u krehkaam ko du neibynta ki kaam khayi kam ka Mela, Circus wa kiwi kiwi ymtoh ya ki wow myntoi ka imlang sahlang.
Hei yatoh wa ini neiliang u DC da ong u wa emkaam u pyndap ki ya ki Form wa chim ki na Sale Tax wei oo won daw phah u yeijooh cha ki heh kani ka tnat.
Iwa ar da ong ki wa neiliang yong oo emkaam wow kyrpaad u ya ka NGT wow pynyinsur yei jngai hei yatoh wa i chna i tei ya iwon iwon harood ka wah Myntdu da kamwa 200 meter na ka 500 meter katkam da hukum da ka NGT wei da kyrpaad leh wow thooh ki laad ki luti wow su ya ka bai lutsan cha kiwa chah ktah wei wow chna ya ka Common Sewage Plant Filter khnang wa ki paidbah u ye ki wow pynkai yei jakhlia neibynta wow yada ya ka wah Myntdu.
“Ym em pyrchah i ya ka hukum ka NGT hei yatoh wa i khang ya kiwon kiwon ki kaam wa chna wa tei harood ka Myntdu, tangwa emkaam u pyrkhat ya kitu kiwa dooh wa duk kiwa em thaw kamjooh ki yung ki sem harood ki wah kiwa da tei nadooh nachwa ki wymtip wa daw mih kam kani ka hukum,” da ong ka seiñ.
Hajrong ini won neiliang u DC da kular u wow chimkhia yeini deiwa kyntu ya kini kiwa mihkhmat wow pynsñiawthooh ya ki paidbah ka Jowai wa emkaam wow chna ya ki Filter ha man ki thlu yung ymtoh wow pynkai cha ka wah.
Ha in i yachem da emlang u M.C. Rymbui kam u President, u L.D. Lakiang kam u General Secretary, u Joy Lywait uwa man kam u General Secretary ka Iawmusiang, u Hamewan Laloo uwa man kam u Waheh Chnong ka Loomkyrwiang wa u Chemlang Maria uwa man kam u Waheh Chnong ka Caroline Colony.
Discussion about this post