Shillong: U Symbood Montri Rangbah ka jylla uwa pait ya ka tnat Distaster Management, u Dr. Roytre Christopher Laloo da ong u wa ka sorkar da dep chem ko wa kamwa 600 tylli ki dieñ kiwa booh hei ma ya ka paidbah wei daw ah noh ya ki du hapoh sor Shillong donhi.
U Dr. Laloo da ong u wa katkam ka bui (Report) wa da yoh ka sorkar, da em kamwa 500 tylli ki dieñ kiwa da booh dak da ka tnat Forest kiwa haap wow deiñ noh katwa 50 tylli toh kiwa da pyntip ki paidbah wa yoo ma i rukom mih kiwa em ha ki yung ki sem ki bru samen.
Heithaw kini ki dieñ kiwa daw chah deiñ katkam ki kyndon ka aiñ haap thung palat chiphaw chah yow pynneh pynsah ya ka rym-aw, da pyntip u Dr. RC Laloo.
Da ong u leh wa boon ki dieñ wa da heh i rta wa da rim ye ki u oor kamwa da jia ini wa dep heipor wa joor u slap wa ka la-ær.
U Dr. Laloo da kam u leh wa ki dkhot ka Disaster Management da leh ki ya ki kaamram yong ki heiwa pat u dieñ ha ka 12 tarik uwa yieñ ha Raj Bhavan uwa da pyntkut leh ya ki sainar bordiñ.
Neiliang yong u Principal Chief Conservator of Forest (PCCF), u C.P. Marak da pyntip u wa ka tnat Forest da pynman ki ya ka lai sylli na ki por cha ki por ha kylleiñ ka sor Shillong wa ki thaw wa yajan wei ya ki dieñ wa em ha pchem ka yung u lat ka jylla da dep wan sylli ya ki ha u bnai wa da dep da u District Forest Officer (DFO).
“Em kamwa 80 tylli ki dieñ heh wa ka tnat da tipmit ko kiwa daw booh hei ma ya ki paidbah neibhah wa ye ki u pat heiwon iwon i por wei na ki 20 tylli, ka tnat Forest da dep chim khia ko wow deiñ noh ya ki “, da ong uni u sahep.
Da ong u leh wa ym em i rta wa mynnu u tymmen u dieñ tangwa deiwa chah baam khniang, i pyut, i khia ki ye ki u oor heiwon iwon i por.
Discussion about this post