Jowai: Ka Ri-loom Jaiñtia toh ka ri-loom kawa mahajon bha ha ki riti dustur lada wyrchaw nadooh ki Chaad, ki Lehniam, ki lehkmen wa kiwi kiwi kiwa da yah da u warim wajah wow pynneh pynsah yei mynsien yamaya wa i mynsien yatylli wei ha kani ka kynti, ynne ka 17 tarik da pynman ya ka Yadaw Masi Rong kawa heh dooh da ka chnong Mynsngat, West Jaiñtia Hills ha Madan Stadium ka chnong.
Ya kani ka Yadaw Masi Rong da pynman khlieh snem hadien wa dep thung dep tep, dep wær kam ka dak wow pynwyrngia, wow wanrah i yatylli wa i yamaya iwi ya iwi nadooh kiwa dooh hadooh kiwa yoh.
Chwa wow sdang ka yadaw masi da em ka yalang wa pyllai da u Chairman ka chnong u Komphrit Surong, heiwa u MDC ka thaiñ u Pheinshwa Langleiñ da man u kam u kongsan.
Da em leh i klam na u Nelson Surong uwa man kam u Waheh Chnong warim ka Mynsngat.
U President ka JSU u Rikut Parein hei klam da ong u wa “lada kwah i u pynneh pynsah ya kani ka riti dustur emkaam ya ar tylli ki phang wow pyndep kiwa kynthup yei yatylli wei kamjooh leh wow im hei suk i saiñ hapoh ka chnong ka thaw” da pynrap u deiwa ong wa emkaam leh u em i mynsien burom kylliang iwi ya iwi.
U Waheh Chnong ka Mynsngat u Phresmi Suting da ong u wa ha kini ki sngi wa dadep em ka chnong hei yapiah yapra tangwa e khublei u ya u Blai wa da wai laad u wei da ye u wanrah biang yei yatylli hapoh ka chnong.
Da ong chooh chooh u wa kani man ko kawa yoosuk u pait wa yawan ki paidbah kamni wei da kyntu u leh ya ki khon ka Niamtre wow ye ki u pynku u pynphooh noh sa ya ka Chaad Sukra.
Kam u kongsan u Pheinshwa Langleiñ da ong u wa dap u dei mynsien wa kmen wow yoh u sakhi ya kani ka Yadaw Masi Rong kawa heh wa kmai bha.
Ha kani ka sngi da em leh ka yaaw bah kawa chisngi heiwa da em ki dukan dukdoh da ki spah tylli kiwa da wan chong da ki bru na kylleiñ ka ri-loom Jaiñtia, da em leh kiwa chong dai madan kiwa dai soh, kiwa pynyalehke kam ki pachat kyrwiang, ki dat ball, ki yachut ball, wa kiwi kiwi. Iwa yoosuk toh wa kiwa wan chongdai ym em u khrong dang ya ki ya ka bai thaw.
Ya kani ka Yadaw Masi da wan sakhi leh da u MLA ka thaiñ u Sniawbhalang Dhar, ki MDC ka JHADC kam u Andrew A. Shullai, u Holando Lamin, u H. Pohthmi, ki ar ngut ki kyrtong kiwa daw yakhun ha kani ka Election MLA 2018 kam u Jopthiaw Lyngdoh, u Innocent Shadap, wa kiwi kiwi ki bru wa pawkhmat yong ka thaiñ.
Ynne da em hadooh 30 jur ki masi kiwa da yadaw ha ka Madan Stadium kawa da pynchongchit ya ki paidpah wa wan paitke.
Discussion about this post