Jowai: Ynnin i miet hadien wa yoh ujor na ki paidbah wa da chna ya u sarok ha Iawmusiang da i khyndawbilat hajrong wa lai wa wan ki kari, ki ar seiñ wa kynthup ya ka JYF wa ka JSU da lai sylli lai pait ki ya ini chna ya u sarok heiwa da chem wa dang khleh khyndaw bilat wei da pyndap ya i thlu da i khyndawbilat wei da tymmoh won da u chyiap. Da chem wa mar ya dep pyndap ki truck, wa ki kari khian kiwa lai neini da ksaaid ki yeini, iwa da pynsepai ya ini i chna pynmiat.
Hei yatoh wa ini ynne ka sngi kini ki ar seiñ hei yahkhmat u President ka JYF u Poipynhun Majaw, wa u Organising Secretary ka JSU u Yoosar Kynjing da lai yachem ki ya u E.E ka PWD Jowai (Central Division) u S. Kyndiah ha karma krehkaam yong oo.
Neiliang u Kyndiah da pyntip u wa ini i chna toh iwa chipor namo ka Temporary Repair du yow pynsuk ya i lai i wan ki paidbah neibhah wa pyn ha u Khonchonglad (November) yong uni u snem daw siang psiang noh ya uni u sarok nadooh na Police Point hadooh wa poi ha yingkieñ Treiongriang uwa man le hi bynta yong u sarok Jowai-Amlarem-Dawki Road.
Da pyntip wa ini i bynta iwa jrong kamwa 4 km daw siang da i psiang iwa rben hadooh kamwa 4 inchi lyngba ka scheme wa da yoh na ka Ministry of Ministry of Highways yong ka sorkar pyrdi.
Discussion about this post