Jowai: Ka seiñ Hynniewtrep Students Union-Central Body da sñiaw phylla ko wa ki ar tylli ki jylla ka Assam wa ka Meghalaya hapoh i pait ki Chief Secretary yong ki da jubab ki cha ka sorkar bei wa ym em i kajia namo i awri awra ha hapyrdi yong ki.
Hei yatoh wa ini neiliang ka seiñ da ong ko wa ym ye u pdiang yeini i kam kini ki ar Chief Secretary.
Ha ka khubor na u president ka seiñ u Kyrshan Rymbai da ong u wa da sakhi neipor cheipor wa ka mih i kynaad hapyrdi kini ki ar tylli ki jylla khamtam haki thaiñ khappood ha Block I wa Block II wei han la kattæ leh kiwa dooh yei mynsien yong ki man i du neidaw wym biang u pood u ang wei i leh stiñ yong ka sorkar wow booh ya ki Police Outpost heini, da ong ka seiñ.
Kam wow pynkynmoo heini ka seiñ da dep thoh ko cha u Prime Minister ka ri hei yatoh wa ini heiwa ka sorkar bei da chimkhia ko yeini waroh.
Neiliang ka seiñ da ong ko wa i pynbait ya u pood u ang ka jylla ym man i katkam iwa yooluti ka seiñ tangwa da jubab hi-eh cha ka sorkar bei wa ong wa ym em iwon iwon i awri awra hanlada dang yoo wa hadooh katni dang em i awri wa mih neini wa i leh embor ka Assam ha kini ki sngi wa dadep, da ong ka seiñ.
Discussion about this post