Jowai: Ynne i step da em ki kattu katni ngut kiwa lai pynthor, na Tuberkmaichnong wei manda poi ki ha i thaw wa em ha Khekyllang, da phylla ki wow yoo wa em wa seh Dieñphna hajan i tre uwi u dieñ.
Ha uni u Dieñphna uwa jrong kamwa chi phut da em leh ka kyrwiang syntu heiwa u syntu da tlor da haap u wei da neh sadu ki kse, donhi.
Neiliang u Waheh Chnong ka Tuberkmaichnong, u Graham Lyngdoh da ong u wa iwa yoo phylla toh wa uni u Dieñphna da seh ha ini i thaw i wymtoh i thaw tlepbru neibhah wa i thaw tlepbru ka Balang Presbyterian wa ka Balang Catholic em i cha iwi tawon i thaw.
“Ymtip i yi wa em hapoh ini i thaw wei nadooh ynnu em uni u Dieñphna, suba i boi em wa tlep iyi iyi heini, ye leh u man wa em wa leh danda” da ong u Lyngdoh.
Da pyntip u wa dadep ujor ki cha ki pulit hei yatoh wa ini iwa chem ki wei neiliang yong ki da wan pait ki ya ini i thaw ynne ka sngi.
Neiliang ki pulit da ong ki wa ymtip yi wa em hapoh ini i khyndaw neibhah yoo lakam wa da rap slem ye u man nadooh chisnem namo da boon bnai kattu neibhah da tymmoh ki phlang ki ranem ya ini i thaw.
Heijooh i por neiliang ki pulit daw hiar biang ki cha ini i thaw mynstep wei daw paanbor ki na ka yung kasari chwa wow leh iwon iwon.
Neiliang ka Dorbar Chnong da kyntu ko ya ki bru kiwa tip chaphang ini i thaw namo kiwa emkti hei wow leh yeini wow wan ki chaphrang, boi neiliang ka yung kasari daw phah khloh ko ya ini i thaw wa em uni u Dieñphna.
Discussion about this post