Jowai : Ka 2nd Volleyball Tournament ka WJDSA da sdang ya ka ynne ka sngi ha madan Biar Pohskur wei da wai ya ka da u Working President ka WJDSA u ma E.M.H Passah ha ka yalang wa tbian wa pyllai da u Vice President ka WJDSA u ma Patrick Lamare.
Ha kani ka yakhun da wan chimbynta da ki 6 tylli ki dhab yalehke Volleyball ki wa kynthup ya ka Lion Socio SC, Loomkyrwiang SC, Chilliang Raij SC, Khimusniang SC, Nangbah SC wa ka Mihmyntdu SC.
Ya kani ka lympung yakop Volleyball da leh da ka League system heiwa kawi kawi ka dhab daw yohlad ki u yakhun mar soo sien chwa u poi cha ka semifinal.
Ha ka yalehke wa nyngkong ynne ka sngi da yachem ka Lion Socio SC (ka wa man leh ka dhab wa rah yei naam Champion ynnin snem) pyrchah ya ka Loomkyrwiang SC.
Ha ka set wa nyngkong ka Lion da khlan bha ko tangwa boon ki bakla ki wa yalehke ko da jop ka Loomkyrwiang 25-23.
Ha ka set wa ar wa ka wa le ka Lion da jop suk ko 25-16 wa 25-12. Kamtæ ka Lion Socio SC da jop ko 23-25, 25-26, 25-12.
Ha ka yaleh ke wa bood ha pyrdi ka Chilliang Raij SC pyrchah ya ka Khimusniang SC ka Khimusniang SC da jop ko 25-12, 25-18.
Ya ki wa kwah lai peitke, ki yalehke sdang ki ha ki por 2 waje i sngi.
Discussion about this post