Jowai: Ka khubor kawa da yoh na Khliehriat, East Jaintia Hills District, hei miet yong ka 30 Khonchonglad 2015, ki nongtooh da wan psiah tooh deiwa khyndang ki ya ka ophis yong u Principal ka Higher Secondary School Khliehriat heijooh i por ya ka ophis krehkaam ka St. Anthony’s College Extension Khliehriat.
Hajrong ini neiliang u Principal Rev. Fr. George da booh u ya ka FIR ha u Officer In-charge Khliehriat Police Station da ong wa kini ki nongtooh da psiah ki cha ka ophis deiwa tympiah ya ka dwar yong ka ophis weiwa da rah ki ya ka Steel Almary kawa em ki kot ki sla kiwa kynthup ya ka Original Vehicle Registration, Certificate Registration No. MLO5-4903 wa ka Insurance Certificate yong kani ka kari, ki kot ki sla kiwa yatoh wa ka Bank, ki thaw ki bhaw, Project work ki khynnah, ki Account ki Records, wa kiwi kiwi.
U Father George, ha ka FIR da ong u wa kini ki nongtooh da sai ki ya kani ka almari weiwa da sai ki ya ki kot ki sla waroh dep tae thang ki ya ki kot ki sla waroh.
Ha kani ka jooh ka miet ki nongtooh da psiah ki cha ka ophis yong ka College St. Anthony’s Extension College, da tympiah ki ya ka almari, wa kiwi kiwi dep tae brait lut ki ya ki kot ki sla waroh cha khyndaw. Da ong leh wa ki nongtooh da wan ki kattu la ar sien weiwa nyngkong da wan ki ar bnai nachwa.
Hei yatoh wa ini ki pulit da wan ki cha kani ka thaw hapoh i yahkhmat u SI M. Marboh da lai li pait li takit ki yeini wa da jia weiwa da register case ki hapoh ki kyndon Case No. 451 (12) 15 u/s 457/ 380/436/ 34 IPC.
Chooh chooh katkam ka khubor da yoh da ong wa kini ki nongtooh ha kani ka miet da khyndang ki ya ka ATM yong ka United Bank of India Khliehriat tangwa ym ye ki u tympiah ya kani ka ATM.
Discussion about this post