Jowai: Ynne ka sngi kam chibynta ka Swachh Bharat Abhiyan kamjooh leh ka sngikha u Mahatma Gandhi da pynman ya ka pynkhooid ya ka Iawmusiang hei ya krehlang wa ka Jowai Traffic Police (JTP), ka Jowai Trader’s Association (JTA) wa ka yung krehkaam u Deputy Commissioner ka West Jaiñtia Hills.
Ha chwa wow sdang da pynman ya ka yalang wa pyllai da u SC Laloo, ADC ka WJH hei emlang u DC u R. Rapthap, ka president ka JTA ka R. Mylliempdah wa u President ka Seiñraij Jowai u OR Challam.
Ha kani ka yalang da yaklam wow thooh laad kammon u pynman ya ka Iawmusiang kawa khooid.
Neiliang ka (JTP) won da li booh tin pyllang jhep ko ha kiwa boon ki thaw ka Iawmusiang.
Ya ka pynkhooid da wan chimbynta kiwa boon ki skur wa em ha Jowai, ki dkhot ka NCC wa ki Scout & Guide kamjooh wa ki tre dukan wei da yabhah ya ki jar jiar i bynta nadooh na HK Singh Memorial School ter ter hadooh wa poi ka Laad Circuit House.
Da wan leh ki kari tympleh diñ kiwa yarap wow siat um wei ya i jhep wei da pynkit ha ki ar tylli ki Truck Shaktiman wei kani ka pynkhooid da pyndep ya ka hadooh 5 waje i janmiet wei da yoh biang ki kari u lai kamwa jooh.
Discussion about this post