Shillong: Ka seiñ North East Indigineous People Forum (NEIPF) ha ka 7 tarik u Naisaphra wei ynne ka sngi da chong yalang biang ki kawa nyngkong yong ka Sub-Committee ha Orchid Lake Resort kawa em ha Umiam.
Kani ka seiñ da jied ko ya u Chairman warim ka ULFA, u Anup Chetia kam u Chief Convener tangwa ym ye ki u pyndep ya ki kaam ki jam wa dang emkaam wa yatoh wa ki phang krehkaam.
Ki seiñ kiwa emlang ha ka NEIPF kynthup ki ya ki dkhot warim ka ULFA , NSCN(IM), ANVC, DHD, ENPO , ka FKJGP na ka jylla Meghalaya wa kiwi kiwi.
Hei yaklam wa kiwa pathai khubor u Spokesperson kani ka seiñ u M. Ibumgochoudibi uwa na Manipur da ong u wa i pynkha ya ka NEIPF toh hadien wa phyllu yumut chaphang wa joor i wan kiwa na baar cha ki jylla wa em ha ka thaiñ Northeast kawa da pynman khian paid ya ki tre jylla ki tre chnong.
U M. Ibumgochoudibi da ong u wa ka phang wa hakhmat dooh ka NEIPF wa chim ko toh wow yada ya ki tre chnong neiwan psiah be-aiñ wa kynthup ya ki nong Bangladesh, Myanmar, Bhutan wa Nepal.
“I em i hadooh 5,500 Km u pood thaiñ Northeast waroh kawi wa ka China, Nepal, Myanmar, Bhutan, Bangladesh wei kamwa man katni ki khappood toh kiwa ye u mih u psiah katwa ngait” da ong uwa yahkhmat ka NEIPF.
U Ibumgochoudibi da ong u leh wa ka Supreme Court leh da ong ko wow tipmit noh ya ki jaitbru Hajong wa Chakma ha Arunachal Pradesh kam ki tre ri wei ini man ko kawa sñiawkhia ka seiñ neibhah ini daw ktah ko ya ki tre chnong wei haap pyrkhat leh ya i yut chnong ki Ronghiya Muslim na Mynmar kiwa ye u psiah leh cha India.
Da ong u leh wa ka NEIPF u pyrchah ko leh yei thmu ka sorkar India wow wanrah yei kylla ya ka Citizenship Amendment Act yong ka riti synchar ka ri neibhah kani daw ktah joor ko ya ka thaiñ iwa man leh pyrchah yei man tre chnong ki bru ka thaiñ.
Discussion about this post