Jowai: Ka Dorbar Chnong Mukhla Nongrim, West Jaiñtia Hills District da pyman ko ya ka pynkhooid chnong ynnin ka 2 tarik kam ka dak wow kynmoo warom ya uwa yah khmat wa khroo ka ri u Mahatma Gandhi wow yaleh pyllait ya ka ri na i synchaar ki phareng.
Ya ka pynkhooid chnong da sdang nadooh 9:00 waje i step hadooh 2:00 waje i sngi heiwa da mih yonglang ki paidbah ka chnong chynrang wa kynthai wow pynkhooid ya ki Dong Mukhla Wahshnong, Neinshnong, Lumtyrnap, Mootepkhla, Lumpohshnong, Moolebnai wa ka dong Treksiar kiwa hap hapoh ka Dorbar Chnong Mukhla Nongrim.
Ha kani ka pynkhooid chnong da wan chimbynta da ki 4 tylli ki skur leh kiwa em hapoh ka chnong kitæ toh ka Mukhla Wahshnong SSA L.P School, Mukhla Nongrim SSA L.P School, Mukhla Nongrim Government L.P School wa ka St. Dominic L.P School Mukhla Nongrim.
Ki khynnah skur da pynman ki leh ya ka lai paidbah deiwa rah leh ya ki placard kiwa em i thoh waphær waphær hei yatoh wow man kiwa leh khooid yow pyndooh jait noh yei myllien leh tngit hapoh ka chnong ka thaw.
Hadien wa kut ka pynkhooid chnong da pynman won sa ka yalang paidbah hapoh ka Dorbar Hall ka chnong Mukhla Nongrim hapoh i pyllai ki Executive Member ka chnong hei emlang leh u Waheh Chnong yong ka.
Ha kani ka yalang pynsñiawthooh paidbah da klam kiwa boon chaphang i emkaam wow man kiwa leh khooid nadooh u Waheh Chnong u Mista Suna, ka Twisida Sari ka Headmistress ka Mukhla Wahshnong SSA L.P School, ka Belda Sari Headmistress Mukhla Nongrim SSA LP School, ka Biche Sari Asst. Teacher ka St. Dominic L.P School Mukhla wa na ka Risita Suna ka Asst. Teacher ka Mukhla Nongrim Government L.P School.
Discussion about this post