Jowai: Ka Nehru Yuva Kendra (NYK) Sangathan Jowai chirup wa i krehlang wa ka Namdong Christian Club Namdong-A da pynemwarom ki ya ka sngi kha u Mahatma Gandhi namo ka Gandhi Jayanti deiwa pynman ya ka yalang pynsñiawthooh paidbah hei yatoh wa i kordor u man ki kiwa leh khooid.
Ya kani ka pynsñiawthooh paidbah da pyllai da u Paulus Shylla wei da pdiang sñiawbha ya ki paidbah da u bru chemphang ka National Youth Volunteer Jowai u D. Lyngdoh wei hadien ini da yoh ya i klam na sa arngut ki National Youth Volunteer yong ka NYK Jowai u J. Phawa wa na u A. Kyndait kiwa e ya ka sikai wa i batai bniah cha kiwa chong chnong hajrong iwa emkaam i leh khooid ha ka imlang sahlang wa ha yung ha sem.
Hadien ini kiwa chong chnong da sdang ki wow pynkhooid chnong hapoh i yahkhmat ki khynroo ka chnong katwa neibynta ka Dorbar Chnong Namdong-A kam chibynta wow yarap ya ki khynnah khynroo da e ki 100 tylli ki kriah pyllang jhep wow li saam cha iwi pa iwi i manyung hapoh ka chnong.
Hadien i pynkhooid won da pynman sa ka “Seminar on Philosophy of Gandhi Jayanti” ya kani ka Seminar da wan e sikai da u J. R. Kharmuti uwa da pynkynmoo ya ki kaam wabha wa leh u Mahatma Gandhi wei da kyntu ya ki khynnah wa ki khynroo wow bood ki ya ki nongmuna u Gandhi.
Discussion about this post