Jowai: Ha ka khubor wa da phah da u Morning Suja President ka Khasi Students Union – Barak Valley Silshar, Assam da ong u wa haka 7 tarik uni u bnai daw leh warom yei dap 10 snem ka seiñ nadooh wa wan seiñ ya ka da u President warim ka KSU u Daniel Khyriem uwa ksoh leh kam u vice President ka seiñ.
Kiwa kitkaam wa nyngkong dooh ka KSU Barak Valley Circle toh u Ketmi Pohthmi uwa man kam u President wa u Edling Pohlong won kam u General Secretary heitæ i por.
Da ong wa ha i lai luti wa 10 snem ka seiñ da maad ko chiboon i eh i khoo khamtam wa em ko chbaar u pood u ang ka Ynniawtrep Ynniaw Skum wei da haap yakhun pyrchah ko ya kiwi tawon ki jaitbru.
Kiwa kitkaam ka seiñ da ong ki leh wa chiboon i yaleh wa haap pyndep ki khamtam wow yada ya ki kynthai khynnah wei ha kani ka kynti chirup wa ka Barak Valley Khasi Jaintia Welfare Committee (BVKJC) dang yaleh ki wow wanrah ya ka Khasi Development Council wei kamjooh wow tipmit ya ki kam ki Schedule Tribe hapoh Assam.
Discussion about this post