Jowai: Ka Moopynieiñ Socio-Cultural & Sports Organisation (MSCSO) yong ka Dong Moopynieiñ, Wapungskur, East Jaiñtia Hills, ynnin ka sngi heipor 1 waje ha Moopynieiñ Playground, da pynhaap pyrda noh ya ka lympung yalehke Football kawa sdang nadooh 5 tarik u Naiynru kawa tip kam ka 7th Cash Prize Football Tournament-2017.
Kani ka Football Tournament ka MSCSO toh kawa pynman man u snem ha Moopynieiñ Playground, Dong Moopynieiñ, neibynta wow kyntu kynrong kamjooh wow e mynsien ya ki khynnah wow ku ki ha ki kaam yalehke Sports khamtam ka Football.
Ha kani ka sngi khaddooh ya ka yalang da pyllai da u M H Dkhar uwa man leh kam u Finance Secretary ka MSCSO heiwa u Justine Dkhar, MLA, Parliamentary Secretary ka sorkar Meghalaya da man u kam u kongsan katwa u Phasmon Dkhar, MDC, EM, JHADC da man ukam u symbood kongsan hei emlang u Topass Lapasam, u Satly Ryngkhlem, Waheh Chnong ka Wapungskur wa kiwi kiwi.
U Justine Dkhar, hawa e i klam ha kani ka sngi da yaroh u ya ka MSCSO kawa pynman ya kani ka lympung wa man u snem kawa thmu wow kyntu kynrong ya ki khynroo ha kani ka sap yalehke.
Da kyntu u leh ya ki khynroo wymhoi u dooh kyrmen ki la ha iwon iwon i kaam leh.
U Phasmon Dkhar, MDC hawa e i klam da ong u wa kam uwi na ki khynroo uwa man leh u MDC oo sñiawthooh bha u ya ki khynroo khyllood wa i eh i khoo wa yachem ki heiwa da pynkynmoo u leh wa ki ye ki u leh chiboon neibhah ka ri wa ka jaitbru.
Ha kani ka sngi da yoh leh i klam na u Satly Ryngkhlem uwa man kam u Waheh Chnong ka Wapungskur wa u D.L Rymbai, u Adviser ka Dong Moopynieiñ.
Ha kani ka yakhun Final ha pyrdi ka Iatyllilang FC wa ka Bhalang Mi-I FC ka Iatyllilang da jop ko da 3-0.
Ya kawa jop da rah ko ka song poisa wa T. 16,000.
Ya i naam Best Player da yoh u Pynshai Lathong, katwa i naam Best Goal-keeper won da yoh da u Jemingson Ryngkhlem wei kini man ki kiwa yalehke ka Iatyllilang FC.
Discussion about this post