Jowai: Ka District Labour Office, West Jaiñtia Hills, Jowai da pynman ko ya ka Medical-Camp neibynta ki wakreh mylla mistri kiwa da Register wa ka Meghalaya Building & Other Construction Workers’ Welfare Board (MBOCWWB) haka 12 tarik uni u bnai ha ka Community Hall ka Khliehrangnah, Shangpung.
Da pynman ya kani ka e dawai mynkna hei yakrehlang wa u Dr. T. Wann wa kiwa kreh ka PHC, Shangpung.
Ya kani ka Medical Camp da sdang deiwa yoh i klam na ka B. Toi, District Labour Inspector, West Jaiñtia Hills wei da yoh leh yei klam na u W. Sutnga uwa man kam u Waheh Chnong ka Khliehrangnah, Shangpung uwa da kyntu ya kiwa mylla mistri ha ka chnong wow man ki kiwa smat wow man dkhot ha kani ka Welfare Board.
Da yoh yei klam pynche hajrong kini ki scheme kiwa phær ka Meghalaya Building & Other Construction Workers’ Welfare Board (MBOCWWB) na u E. Lapasam, Labour Inspector, Laskein Block kiwa kynthup ya ka bai baam tymmen, ka ka bai skur khon, ka bai thiah hospital, i yarap ya ki khynnah kiwa pass bha wa kiwi kiwi.
Hawa kut kani ka yalang da yoh ya ki kyntien khublei na u B. Sohkhlet, Labour Inspector, Thadlaskein Block.
Ha kani ka sngi da saam leh da e ya ki 15 tylli ki Scholarship na ka MBOCWWB kiwa T. 5,600 hadooh T. 7,000 cha ki khon kiwa kreh mistri kiwa da register wa kani ka Welfare Board. Heijooh i por da pynpsiah ya ki pyrtuid thymme yong kiwa kreh mistri ha kani ka Board kiwa kynjoh hadooh 268 ngut ki waroh.
Discussion about this post