Jowai: Ka yalang wa jhan yong kiwa sikai SSA kiwa yaleh ya ka Diploma in Elementary Education (D.El.Ed) training yong ka 1st Batch 2013 na waroh 11 tylli ki Study Centre hapoh East wa West Jaiñtia Hills District wa kiwa sikai SSA kiwa dangdep register wot ya ka online D.El.Ed Training wa ka NIOS ha u Naisaphra wa Naikhynde uni u snem daw man ko haka 20 tarik uni u bnai hapoh Community Hall Khliehriat West Iawpyngkat heipor 10:00 waje i step.
Ha ka khubor wa da phah da u Greeting Hynniewta, General Secretary ka MSSASA East Jaiñtia Hills District Unit da pyntip u wa ha kani ka yalang daw pynsñiaw ya ki kaam hei yatoh wa ka Legal Notice wa da phah da ka MSSASA Seiñbei cha u Chairman ka NIOS ha u Naiynñiaw uni u snem nalor kiwi kiwi kiwa emkaam wow leh hei yatoh wa i wow pynbait ya ka D.El.Ed Result yong ka 1st Batch 2013.
Daw hikai leh ya kiwa sikai SSA kiwa dang dep register online D.El.Ed Training kammon wow register ki hapoh ka Swayam Portal wow yoh yei hikai yong ka Diploma in Elementary Education (D.El.Ed) katkam wa phah ka MHRD wa ka NIOS. Kiwa yahkhmat ka MSSASA nadooh u President yong ka u Aristotle C. Rymbai wa u General Secretary u H.M.Marbaniang daw emlang ki ha kani ka sng.
Kamtæ da kyrpaad ya waroh kiwa sikai SSA kiwa yaleh ya ka D.El.Ed Training yong ka 1st Batch 2013 na waroh 11 tylli ki Study Centre wow wan ki cha kani ka yalang khnang wow yoh ki chiboon i myntoi na ka.
Discussion about this post