Chi tayaw dawa ka MCVU wow khang ya ki truck na baar jylla wow wan kamai pahooh ha Meghalaya

Shillong: Ka Meghalaya Commercial Vehicles Union (MCVU) da e por ko chi tayaw ya ka sorkar, ka KHADC wa ka JHADC wow khanglaad ya ki kari khamtam ki truck kiwa na baar jylla kiwa wan kamai pahooh ha kani ka jylla wow kit khyndaw-bilat khlem kawon kawon ka kyndon hadooh wa da tynyap ja ki ya ki tre ri wa ki tre chnong ka jylla.

Hawa yaklam wa kiwa pathai khubor u President  ka MCVU, u Handle Mukhim da ong u wa neiliang ka seiñ dadep yachem ko boonsien ya ki bor sorkar, ka KHADC wa ka JHADC ha ki bnai wa dadep heiwa da toh u thooh ki laad ki luti wow khang laad noh ya kini ki kari kiwa na baar kiwa wan kamai wow kit mar ha kani ka jylla, iwa da tynyap ya ki kari yong ki tre chnong ha ka jylla tangwa ini waroh man i iwa sepai.

U Mukhim da ong u wa nadooh wa khang ka NGT ya i tih mooyong, nalor ki moo ki chyiap wa ki dieñ, kiwa yah truck da yachem ki chiboon i eh i khoo ha i kamai wei manda kyruiñ won ki cha ka kaam kit khyndaw-bilat leh chah ksih dor ki ha ki karkhana wow kit hei dor wa khian.

Da khana u leh katkam i dor iwa da booh da ka sorkar nadooh u Naitung (April) 2005 ka dor wow kit khyndaw bilat toh T. 1100 hadooh T. 1400 chi ton nadooh Jaiñtia Hills hadooh Shillong, tangwa katni won da ksih dor ki karkhana cha ka T. 700 hadooh T. 850 chi ton ka bai kit. Heiwa da pynsñiaw u yei mynsien wa phylla wa ka sorkar ym em u pynku ko ya ini i dor næ i wym chimkhia ko hajrong ini waroh.

Related posts

Kyrchaan ka Kur Sari Mukhla Umlangshor ya u Bitos Sari kam u kyrtong MDC na 5-Mukhla Ummulong

January 17, 2025

Pynbna ka NPP ya ka thup wa le ki kyrtong MDC cha ka JHADC

January 15, 2025

U Mukhim da ong u wa ki kari kiwa na baar jylla hawa wan ki cha kani ka jylla emkaam wow em ki ya ka Regional Permit, ka Special Permit wa kiwi kiwi tangwa katkam wa man hi katni ka sorkar da chah laitlaan bait ko ya ki khlem kawon kawon ka kyndon wow kdoh ya ki.

Ka seiñ da kyrpaad ko leh ya ka KHADC wa ka JHADC wow pait bha ki yeini khamtam ya ki kot ki sla yong ki kari kiwa wan kamai cha kani ka thaiñ tangwa ki won da ong ki wa ini toh i kaamram yong ka sorkar jylla katwa ka sorkar jylla won ong ko wa toh i kaamram ki District Council.

Da pynkut u leh deiwa ong wa na kini kiyi kiyi waroh ka Union da chimko ya ka rai wow pynbman noh da i yakhih lada ym leh ki yeiwa emkaam.