Jowai: Ka Dorbar Chnong Ladthadlaboh kawa man kawi na ki chnong ha sor Jowai kawa yaar bha u pood u ang,ynnin ka sngi da ebor ko ya ki le tylli ki kyntoit namo ki dong wow yoh noh ki yei bor wow synchaar pyndaki yaki hi.
Kini ki le tylli ki dong namo ki kyntoit yong ka Ladthadlaboh kynthup ki yaka Caroline Colony, Tyndowapung wa ka Lumpariat.
Hachwa wow e bor ya kini ki le kyntoit ynnin ka sngi, da pynman ya ka yalang ha Indoor Hall ka Ladthadlaboh Dorbar Chnong hei emlang u Chairman Chnong ka Ladthadlaboh, u J.M. Paswet, u Waheh Chnong u L.D. Lakiang, u General Secretary ka Ladthadlaboh u A.B.M. Shullai, u Chairman wa Secretary ka Review Committee Ladthadlaboh u K.D. Syngkon wa u A. Langstang deilang wa kiwa yah khmat ki le dong wa kiwa heh wa sian.
U L.D. Lakiang hei klam yong oo da ong u wa ka Ladthadlaboh da seiñ ya ka nadooh u snem 1942 wei da man ko ka chnong wa pura ha u snem 1953 hadien wa ebor ka Dorbar Dong Iawmusiang.
“Ki sngi ki snem kiwa lai, ka Ladthadlaboh dang boon kiwa chong chnong hapoh yong ka wei da mih leh boon tylli ki kyntoit wei da tipmit leh ya ka da ka Jaiñtia Hills Autonomous District Council (JHADC),” da ong u Lakiang.
Kamtæ da chim ya ka rai lyngba ka Ladthadlaboh Coordination Committee wow pait hajrong u pood u ang wa da emlang u Dolloi ka Elaka Jowai ha u Naiynru ka 30 tarik u snem 2016 chwa wow ebor wow synchaar ya ki le kyntoit wow synchaar ki pyn da ki ya ki hi.
Ha kani ka yalang da yoh yei klam na kiwa mihkhmat ki le kyntoit wa kynthup ya u S. Myria na Caroline Colony, u A. Kharkongor na Tyndowapung wa na u J.K. Rymbai na Lumpariat.
Waroh kini da pynsniaw ki yei sniawngooh ya ka Ladthadlaboh Dorbar Chnong hajrong wa ebor ko ya ki wow ye ki u synchaar hapoh u pood u ang yong ki.
Discussion about this post