Cheiwon wiar ka poisa wa phah ka sorkar pyrdi wow chna sarok, ki thaw sumaar wa kiwi kiwi?: Nalin Kohli

Jowai: U David Kharsati uwa man leh kam u State Vice President ka Meghalaya yong ka BJP ynne ka sngi ha ka yalang wa pynman ha Jowai da ong u wa ka BJP phær ko na kiwi ki seiñ saiñ hima sima neidaw wa ka kwah ko yei kyrchaan ki paidbah yow chakri ya ki ymtoh wow synchaar ya ki kamwa kwah kiwi ki Party.

Da ong u leh wa ka Party ym su ko da ka poisa yow yoh vote wei ya kiwa baamtooh nadooh ki montri hadooh kiwa kreh sorkar daw pynchitom ya ki katkam ka aiñ. “Lada ki Montri ka BJP ymye ki u chakri ya ki paidbah ki paidbah ye ki ujor pyrchah ya oo cha ka Party wei lada chem wa ym em kreh u neibynta ki paidbah daw pyndooh yei kyrdan Montri yong oo.”

Chooh chooh da ong u wa da em ki bru wa kylli ya oo wa kammon lai yaseiñ u man ka tayaw hadien wa psiah u cha ka BJP? Da jubab u deiwa ong wa tista u wow lai yaseiñ tæ neh u ha ka BJP.

Da ong u wa lada ka BJP toh kawa chongchit niam Hindu neiyi i daw wa ka em ko ki MLA hadooh ki Montri Rangbah wa man kam ki Kristan.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Chooh chooh da ong u wa da jied u ya ka BJP neibhah ha u snem 1998 heipor waka UDP em ko hei bor ym em leh ko iyi iyi leh yeiwa da kular ko ya ki paidbah.

Da sai u leh ya u Aadhaar Card u deiwa ong hawa boon kiwa pyrchah ya u Aadhaar na ki daw wa boonjait tangwa oo hadooh katni leh ym em chem u wa wiar wa chah tooh ka poisa u.

Neiliang u Nalin Kohli u National Spokesperson ka BJP uwa pait leh ya ka Meghalaya da ong u wa ka Congress da sai ko da ki ñia chaphang ka niam neibhah wa ym em ñia de ko da iwi wei ka tieñ bha ko ya ka BJP.

Da ong u leh wa ha ki 10 snem, ka Congress ym ye ko u pynyoo ya ki kaam wa bha wa da leh ko, wei nadooh wa chimkti wow pait ya ka jylla Meghalaya da lai uiñ u ha kylleiñ ka jylla wei nyngkong dooh da yoo phylla u yei sih ki sarok hadooh wym ye mutdur de, kamtæ da kylli u cheiwon wiar ka poisa wa phah ka sorkar pyrdi nadooh wow chna sarok, ki thaw sumaar wa kiwi kiwi. Da kyntu u ya ki paidbah wow paan jubab naka sorkar Congress hei yatoh wa ini.

Heiyatoh wa i chah khang mooyong da ong u wa da lai kattu la 3 snem wei hadooh katni leh ym poi de ka Mining Policy cha ka NGT. “Lada lai ka sorkar Congress dei kjat cha Delhi chirup waka Mining Policy ngait O le snem da poi bait ki cha Delhi.”

Da kular u leh wa lada poi ka BJP hei bor ha u 2018 hapoh 6-8 bnai da lait biang u khih mooyong.

U montri ka tnat PWD & Rural Development ka sorkar BJP ha Manipur u Biswajit Singh da ong u wa nyngkong ym em wa poi pyrkhat wa ka BJP u yoh ko wow chna sorkar ha Manipur, wei manda chna sorkar ko pynyoo i wa ki paidbah hi kwah ki ya ka sorkar wa thymme wa ye u kreh neibynta yong ki.

Hei klam u Singh ha kani ka sngi da e nongmuna u leh ya ki kaam wa da kreh ka sorkar jylla Manipur hei wow pynkrehkaam ya ki scheme ka sorkar jylla kamjooh leh yong ka sorkar pyrdi.

Kiwa mih khmat na Manipur da ong ki wa ha chwa ka Election MLA wa dang dep pynman dang hapoh chi snem ka BJP ym jooh em ko uwi leh u MP kamjooh u MLA tangwa katni da em ki 21 ngut ki MLA wei da yoh ki leh u chna sorkar wei ini sariem ko yeiwa jia hapoh ka jylla Meghalaya wei ym toh iwa eh wa ha Meghalaya leh ini ym ye i u jia.

Khaddooh da kyntu u ya waroh wow yakrehlang wei wow kyrchaan ki ya ka BJP ha kani ka Election 2018 neibynta wow ye ko u chna sorkar khnang wow ye ko u synchaar salonsar ya ki paidbah liang wanang kamwa man ha kiwi tawon ki jylla wa em ka sorkar BJP.