Shillong: Ka Chairperson yong ka National Commission for Women (NCW), ka Rekha Sharma da ong ko wa ki kynthai ha kani ka thaiñ dang haap ki u lai ka luti jngai wa jrong yow yoh ki u chimbynta ha ki kaam saiñ pyrthai, ki kaam niam, ka kahyi pateiñ wa kiwi kiwi.
Hawa klam ko ha ka yalang ka commission ha North Eastern Council (NEC), Nongrim Hills, ka Rekha da ong ko wa ha phra tylli ki jylla kani ka thaiñ ki phær ki haka liang ka riti dustur, ka niam ka rukom, ka ktien thylliej, ki kam saiñ hima sima nalor wa em ki jaitbru waphær waphær.
“I eh wa ha khmat dooh ha ka thaiñ toh i yaphær yumut, i phær jaitbru, ka riti dustur kawa ym wai laad ya ki kynthai”, da ong ko.
Da ong ko leh wa ki kynthai ha kani ka thaiñ ym yoh kabu bha ki wow chimbynta ha ka niam ka rukom, ha chnong ha thaw wa ha ka saiñ hima sima.
“Na i rukom ngait niam cha ka saiñ pyrthai, ki kynthai ha kani ka thaiñ ym yoh ki u yachimbynta wei duna kiwa yachimbynta leh ha ka saiñ pyrthai wei du khajik donhi kiwa man MLA lada kheiñ lang iwa pynyoo wa ki kynthai ym pu em yoh bor ki ha ka saiñ pyrthai”.
Da ong ko leh wa ki kynthai ym em yoh hok ki ha ka khyndaw ka chyiap wei kani emkaam u pait bha katkam ka aiñ.
Ka kyntu ko leh wa emkaam u e sikai ya ki kynthai wa da khlaad kurim, kiwa chah ieh kurim, kiwa chah ieh ha ki kaam yow ye ki seiñ khih yong ki hi.
Chooh chooh da ong ko wa emkaam wow pynbniah ya ki yow ye ki u kyrchaan ya ki khon ki kti khnang yow ye ki u phah skur wow pynnang pynstat ya ki khon.
Discussion about this post