Da wai ya ka yungkrehkaam ka Jowai Block yong ka NPP ha Jowai

Jowai: Ka National People’s Party (NPP) ynne ka sngi da wai ko ya ka yungkrehkaam ka 2 Jowai Legislative Assembly Block kawa em ha Ladthadlaboh, Jowai.

Ha kani ka sngi da emlang leh u Wailadmiki Shylla uwa man kam u kyrtong ka NPP na 2-Jowai Constituency, u State Youth Vice President u F.W. Nongbri, u District President u O. Lamin, u District President Youth Front u J.G. Kyndiah, u Block President u Darilang Lamare, Secretary ka Jowai Block u O. Lamar wa kiwi kiwi ki dkhot ka seiñ.

Ya ka yalang wai ya kani ka yungkrehkaam da pyllai u Darilang Lamare, wei da pynbood ya ki kyntien ngoohblai na u dkhot ka seiñ u M. Rymbai.

Hadien ini da yoh yei klam na u O. Lamar wa na u J.G. Kyndiah.

U kyrtong ka party u Wailadmiki Shylla hei klam da ong u wa dap u dei mynsien wa kmen wa da ye u booh ya kani ka yungkrehkaam neibhah deiwa em ko da yoh u yachem para dkhot wa kiwa kitkaam ka party; daw yoh u chong yaphyllu yumut neibynta ki kaam wa bha wow kyntu kynrong ya ka imlang sahlang wa kiwi kiwi.

U O. Lamin da klam u chaphang ki yurim yong ka party wei i rukom krehkaam yong ka wei hadien ini da wai ya kani ka yungkrehkaam.