Iyi wit ka sorkar jylla hawa kwah ka BJP wa ka AoL u wanrah yei suk hapoh jylla?: HNLC

Shillong: Ka seiñ Hynniewtrep National Liberation Council (HNLC) ynne ha ka khubor wa da phah da u Publicity Secretary ka seiñ u Sainkupar Nongtraw, da e yaroh ko ya ka sorkar pyrdi NDA wa ya ka Art of Living (AoL) wa thmu ki wow khut yaklam noh ya ka seiñ.

U Lamsalanki Pariat na Jowai wa u Samir Jolly na Noida, da chah kem ki chwa wow psiah ki cha ka ri Bangladesh ha Dawki.

Ka seiñ da ong ko wa ini i chah kem kini ki ar ngut man i pyrchah ya ka aiñ neibhah wa kini ki bru yong ka Art of Living da leh ki yei kaam wa bha tangwa ki pulit da pynthut ki yeini kamwa da jooh leh ki nachwa heipor wa kwah ka seiñ wow wan yaklam yasuk noh.

Da ong chooh chooh ko ya kini ki ar ngut toh ki bru yong ka sorkar pyrdi, kawa da ebor ya ki wow lai yachem wa ki heh yong ka seiñ HNLC.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Heijooh i por ka seiñ da pynbaad ko ya ka sorkar pyrdi hapoh i yahkhmat ka Congress kawa tip leh kam ka sorkar UPA wa ym em u chimkhia ko yeini heipor wa tyrwa yaklam yasuk ka seiñ nadooh u snem 2004 deiwa pynkynmoo leh wa ka sorkar jylla hapoh i yahkhmat ka Congress wa u Dr. Mukul Sangma kam u montri rangbah da tyrwa yaklam wei da kyntait yaklam ki waka HNLC ha u snem 2014.

U Nongtraw da ong u wa ki pulit smat ki u kem ya kini ki ar ngut neibhah wa ym em u yohbor ki na ka sorkar jylla tæ neiyi i daw won wa ym em u kem ki ya ka montri ki kaam pohyung ka jylla ka Roshan Warjri kawa jooh yaklam wa u General Secretary ka seiñ khlem tip ka sorkar jylla.

Da pynksan chooh chooh u yeiwa da pynbaad ka seiñ pyrchah ya ka sorkar jylla hapoh i yakhmat ka Congress kawa tip kam ka Meghalaya United Alliance (MUA-II) kawa da pteiñ bait wow paan yei kyrchaan na ka HNLC neibynta ka Election MLA 2018 wow wan. Da pynkynmoo u leh yeiwa ka sorkar jylla da pynap pynsñiaw ko ha u Naisan uni u snem wa paan ko yei kyrchaan na ka seiñ.

Da pynkut u leh deiwa ong wa ka sorkar pyrdi wa ka sorkar jylla hapoh i yahkhmat ka Congress ymye ki u pynbait ya ini i kaam nadooh u snem 2004, wei da kylli u leh wa iyi wa wit hawa ka BJP wa ka Art of Living kwah ki u wanrah yei chongsuk hapoh ka jylla.