Jop ka Narwan ya ka ya ka lympung yaleh bol wa pynman ka Jalaphet Lumsashram Sport Social & Cultural Sport Club

Jowai: U Vincent H Pala, MP ka Lok Sabha ynnin ka 25 tarik da wan u wow pynhaap pyrda u ya ka yalehke Football Final wa pynman da ka Jalaphet Lumsashram Sport Social & Cultural Sport Club, East Jaiñtia Hills District heiwa emlang leh u MLA ka thaiñ u Hopefull Bamon, ki arngut ki MDC ka JHADC u Hopingstone Bareh u Philip Tangliang, wa u MLA warim u Shitlang Pale, u CEM warim ka JHADC u Hambertus Nongtdu, u Defender Pakem President HSPDP, East Jaiñtia chirup wa ki heh sorkar waphær waphær.

U Vincent H Pala hei klam yong oo da yaroh u ya ka Jalaphet Lumsashram Sport Social & Cultural Sport Club, yei wa pynman ki ya kani ka lympung wei man ko leh ka Club wa pawnaam bha ha katai ka thaiñ.

“Ki yalehke Sports man ki deiwa krehlang kawa ym em pait yei yaphær niam, yaphær jaitbru, yaphær ha ka kaam saiñ hima sima kawa da pynwiar lut ya i sñiaw yaphær yumut kawa wanrah ya ka yatylli wa i kreh i yakreh lang,” ong u Pala.

Chooh chooh da ong u wa kam kiwa chong chnong hi lada daw em ki i sñiaw yaphær ki ha i por Election, tangwa neibynta ka roi ka paar haka chnong ka imlang sahlang emkaam u yakrehlang waroh.

Related posts

Sdang ka Subroto Cup 2025 ka West Jaiñtia Hills

June 2, 2025

Ha Jowai wa Wahiajer u pynman ya ka Subroto Mukherjee Cup 2025 ka West Jaiñtia Hills

June 1, 2025

Da yooluti u leh waka Lumsashram daw pynmih chooh chooh ko ya kiwa yalehke wa chyrkhei ki wow pynchlur ya kiwi ki khynroo yow lait ki na ki kam wa sih kam wow dih ya ki jait pynmuaid wa boon jait.

Heiyatoh wa i dawa ka Club wow yarap pynyoh poisa kamwa T. 23 Lak wow chna ya ka madan bol, da kular u Pala wow e T. 10 Lak, da kyrpad u leh ya ka chnong kamjooh ya ka Club wow pynbiang ki ya ki kot ki sla wa emkaam.

Hawa kyruiñ cha ka yalehke bol, nadooh wa sdang da em 32 tylli ki dhab wa wan chimbynta yow poi cha ka thong jop tangwa ha ka Final da poi ka Narwan SC pyrchah ya ka Umkyrpong SC.

Ka yakhun Final man ko kawa yathaiñ bha wei kawa chongchit bha heiwa da sakhi leh ya ini na ki paidbah wa wan paitke.

Hadooh wa kut i por ym em wa yoh u thap kool kamtæ da rai ya kiwa jop da ka yachut Tie-breaker heiwa ka Narwan da jop ko da 6-5.

Da saam leh ya ki khusnaam Best Goal Keeper wa da yoh u uwa yalehke ka Narwan u Siwell Rymbai wei ya ka khusnaam Best Player da yoh u Heras Paslein naka Umkyrpong.