Shillong: Ka Montri ka tnat puræ puthi ka jylla ka Deborah Marak da pynsñiaw ko yei mynsien wa khia yei wym yoh tulop kiwa sikai SSA ka jylla da boon bnai.
Hawa klam ynne ka sngi ka Deborah da ong ko wa neiliang yong ka ym em u chong kli-kti hi-eh ko hawa yoo ko yei eh i khoo wa yachem kiwa sikai skur khamtam i wym yoh tulop ki, deiwa ong wa i daw wym yoh u su tulop toh wa ka sorkar pyrdi ym em u pyllait poisa ka sorkar pyrdi.
Da ong ko wa ka sorkar jylla wei ka kam ka montri kani ka tnat da jooh pynsñiaw ko yeini wei da kyrpaad ko ya ka sorkar pyrdi wow pyllait noh ko ya ka tulop wei hadooh ynne ka sorkar pyrdi ympu em u pyllait ya kani ka poisa kawa da wanrah yei eh hapoh ka sorkar jylla.
Da ong ko wa neiliang ka sorkar jylla daw chong ko wow yaklam ya ini i eh i khoo wa kammon wow thooh laad wow pynbiang ya ka tulop yong ki.
Dang ini wa dadep kiwa sikai skur SSA hapoh ka jylla hapoh ka lama yong ka MSSATA da kam ki wa ka sorkar pyrdi da pyllait ko ya ka tulop yong ki lyngba ka tnat Human Resource Development (HRD), wei toh ka sorkar jylla kawa toh u bhah ya ka tulop.
Kini kiwa sikai da booh por ki leh wa lada ka sorkar ym pyllait ko ya ka tulop chwa ka 8 tarik uni u bnai daw pynman ki ya ka yakhih yonglang kiwa sikai SSA.
Discussion about this post