Ymbien u PIO wow jubab ya ka RTI wa paan u Madal Sumer hei yatoh wa ka tulop ki Parliamentary Secretary

Jowa: U Madal Sumer uwa yaleh mutkotduma wow pyndooh ya ka aiñ thung Parliamentary Secretary ka sorkar Meghalaya da pyntip u wa ka sorkar da yait ko wow jubab ya ki phang kylli wa da booh u ha ka RTI kawa kylli ya ka poisa wa da sai ki Parliamentary Secretary, ka tulop ki wa kiwi kiwi.

Kani ka RTI toh kawa da booh nadooh ka 20-09-17 heiwa da em 10 tylli ki phang kylli kiwa paan ya ka tulop wa yoh ki Parliamentary Secretary, TA/DA wa kiwi kiwi wa su cha ki heipor wa ksoh ki ya i kyrdan Parliamentary Secretary nadooh u Wisu (March) 2013 hadooh u Naiynñiaw 2017.

Nyngkong ya kani ka RTI da booh ha ka yungkrehkaam u Chief Secretary heiwa da jubab wa u Chief Secretary ym man u kam u Public Authority neibhah ya ki RTI man ki kiwa haap e ha ki tnat kreh sorkar waphær waphær kamtæ ka yungkrehkaam u Chief Secretary da phah ko ya kani ka RTI cha ki Public Information Officer (PIO) ka Cabinet Affairs Department, Law Department wa cha ka Parliamentary Affairs Department yow leh ki yeiwa emkaam.

Ya kani ka RTI da jubab da u PIO wa man leh kam u Under Secretary ka Cabinet Affairs Department heiwa na ki 10 tylli ki wa da kylli da jubab u du artylli donhi kitæ toh katwon ngut ki MLA wa da thung kam ki Parliamentary Secretary wa i pyrtuid ki Parliamentary Secretary.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Kiwi de ki phang kylli toh chaphang ki myntoi wa yoh ki Parliamentary Secretary, ka tulup ki, ka TA/DA won ym em jubab u PIO.

Neiliang u Madal Sumer da ong u wa hadien wa ka Meghalaya High Court da e ko ka rai wa ka aiñ The Meghalaya Parliamentary Secretaries (Appointment, Salary, Allowances and Misc) Act 2005 man be-aiñ ko, ini mut wa waroh iwa dadep su cha ki Parliamentary Secretary man ki leh kiwa be-aiñ wei toh u pynuiñ biang ya kani ka poisa cha ka sorkar.

Da ong chooh chooh u wa ka aiñ kamjooh ka riti synchaar ka ri da klam che ko wa ya ka poisa wa yoh lyngba ki kaam be-aiñ khamtam ya ka poisa paidbah lada toh ki MLA, ym chah de u yaleh Election ki lada ym pynuiñ ki ya ka poisa.

Da ong u leh wa yooluti u wa ki MLA deibor yong ki hi daw pynuiñ ki ya ka poisa yow pynyoo cha ki paidbah wa ki ymtoh kiwa khwan, wei ya ka poisa wa pynuiñ yow ye u pynemkaam neibynta i bha i miat ki paidbah.