Jowai: Ka Chankylliang Development Society (CKDS) da sdang ko ya ka Coaching Class wa mynkna ya ki khynnah wa daw yaleh exam matric wa pynman ha Dominic Higher Secondary School Mowkyndeng ka wow pynman nadooh ka 4 tarik uni u bnai haddooh 3 tarik Wisu (March) 2018.
Ya kani ka Coaching Class da wan wai da u Chanky Lyngdoh MDC ka 13 Saphai Constituency hei emlang u Waheh Chnong ka Mowkyndeng u P. Synnah wa u Secretary Chnong u P. Dkhar, ka Headmistress ka skur, u Jimmy Lyngdoh Program Manager ka CKDS deilang wa kiwa sikai katai ka Coaching Class.
U Chanky Lyngdoh hei klam yong oo da pynchlur u ya ki khynnah skur wow chim ki ya kani ka kabu ksiar deiwa wan tista wei u minot ki u pyndep ya kani ka Coaching Class wei wow pynemkaam hok yei por yong ki.
Da ong u leh wa ka Laskein Block man ko kawa dang sahdien bha ha i puræ puthi lada wyrchaw wa kiwi ki Block kiwa da ku chaphrang wei da kyntu u ya ki khynnah wym hoi u pynsepai ki ya kani ka laad wa yoh ki.
Da em kamwa 180 ngut ki khynnah ki wow yaleh matric kiwa da wan cha kani ka Coaching Class.
Discussion about this post