Shillong: U Montri Rangbah ka jylla u Dr. Mukul Sangma da pynsñiaw u yei mynsien sñiawsih kthang wa u Montri Rangbahdooh ka ri u Narendra Modi da pynemkaam u ya ka rynsan sorkar yow yalap neibynta ka Party yong oo i wa man pyrchah yei rukom krehkaam.
Da sñiawphylla u leh u yeiwa ong u Modi wa ym em pynkrehkaam ya ki kaam pynroi hapoh ka jylla tangwa smat u wai ya ka sarok wa chna da ka sorkar jylla wa pynbiang poisa da ka sorkar UPA wa yahkhmat ka Congress kawa sñiawthooh yei emkaam ki paidbah wei da pyllut ko chiboon wa kynthup wow chna ya ka Shillong Bypass wei wow pynheh ya ka sarok Shillong–Guwahati.
Chooh chooh da ong u wa waroh kini wa da leh toh ym jooh em yoh ka jylla kamni nachwa, ini toh neidaw wa joor i maya ka ka Sonia Gandhi wa u Dr. Manmohan Singh ya ka jylla wei kini ki sarok da pynyabi ko ya ka thaiñ na mihsngi hadooh wa sepsngi. Kiwa em cha sepsngi katni ym emkaam de ki u lai lyngba ka Guwahati yow poi cha Shillong.
Hei yatoh wa i chait i khiah, u Dr. Mukul da ong u waka jylla man ko kawa ha khmat dooh wow wanrah ya ka Health Insurance Scheme (Meghalaya Health Insurance Scheme). Kani toh kawa wanrah yei yarap liang wanang ha i im ki bru wei katni waroh ki bru nadooh kiwa mahajon hadooh ki wa dooh da wan ki hospital ki bru samen kamjooh ki yong ka sorkar wow chim kabu ya ini hadooh ka sorkar pyrdi da khut ko ya ka jylla Meghalaya yow sikai ya kiwi ki jylla chaphang ini.
Da pynkut u deiwa ong wa ki jylla wa em ha thaiñ mihsngi nachwa jooh yoh ki ya ka Block Grant lyngba ka Planning Commission hapoh ka sorkar UPA. Ya kani ka poisa da pynemkaam wow sdang ya ki Scheme sorkar wa boon kam ka MHIS wa kiwi kiwi. Tangwa nadooh wa synchaar ka BJP ym jooh em de yoh ya kini ki Block Grant wa yarap wow pynku ya ki jylla ka thaiñ mihsngi.
Discussion about this post