T. 10 Lak e u R. Syngkon ya ka Seiñ Raij Mowtyrchiah yow chna khnap thangbru

Jowai: Ki khon ka Seiñ Raij Mowtyrchiah-B da pynsniaw ki yei sniawngooh ya u MLA yong ki u R. Syngkon uwa yarap poisa T. 10 Lak lyngba ka Special Rural Work Programme (SRWP) yong oo wow chna ya ka khnap thangbru ha loom thang bru ka Mowtyrchiah-B.

Ya ka Work Order da e ynnin ka sngi ha ka yalang wa pynman ha Community Hall ka Mowtyrchiah-B heiwa da emlang u Waheh Chnong u Genis Suchiang, ki heh ka Seiñ Raij Mowtyrchiah, ki waheh wa siañ ka chnong kamjooh wa ki paidbah.

Neiliang ka Raij da ong ko wa manda em kani ka khnap thangbru daw pynsuk ko ya ka lehniam lehrukom.

U Waheh Chnong da pynsniaw u leh yei sniawngooh ya u MLA uwa da kreh chitom wow pynyoh poisa wow chna ya ka sarok psiang ha ka chnong Mowtyrchiah-B kawa jrong 3 Km hei dor wa T. 2 Klur tam.