Jowai: Ka Seiñraij Jowai ynne ka sngi da pynman ko ya ka yalang kynmoo warom ya lyngkhooh dap snem 155 wa chah pasi u Kiang Nangbah ha ka sorkar pharæng.
Ka yalang wa pynman ha Loompyrdi Iongpiah da wan sakhi da u MS Rao, Principal Secretary ka sorkar Meghalaya kam u kongsan, hei emlang u Dr. Sylvanus Lamare, Pricipal ka St. Edmunds College, Shillong, u F.R. Kharkongor Chief Election Officer ka sorkar Meghlaya, u Puramon Kynjing Dolloi ka Jowai Elaka wa kiwi kiwi.
Ha chwa u sdang ka yalang da li booh syntu chwa ha u mot-dur sahkynmoo u Kiang Nangbah wa em ha Poh Ka Blai, Mooliksoo.
Ya i parom u Kiang Nangbah da khana da u Juhhi Nanghuloo, Joint Secretary SRJ uwa da khana wa u Kiang Nangbah wa nadooh wa dang khian u toh uwa ka-it u kyndeh ke wa ki lok ki jor wei heipor khynroo uwa sñiawsuk u siat khnam, rah moo khrah, put chawiang wei ka bei yong oo nadooh wa dang khian u jooh khana ko ya oo yeiwa leh embor ki pharæng kiwa da tynyap leh ya u masan yong oo.
Da khana ko leh yeiwa khang ki pharæng ya ka kur Sumer wow thang ya uwa khlaad, i pynsangeh ya ka chaad pastieh ha Ialong wei kini waroh da pynpsiah ko ha oo yei mynsien wow kynchiñ ya ki pharæng.
Hadien wa pynbna ka sorkar pharæng wow khrong dan da ka bai yung bai khyndaw bai chyiap u Kiang Nangbah da pyrchah joor u yeini hadooh wa da pynjæd u ya ka hukum wa pynbna u Dolloi Tynger wei hadien ini, u Dolloi Tyngker da leh embor u wow khrong dan na kawi ka manbei heiwa da wan u Kiang Nangbah wow yarap ya kani ka manbei wei da tba kti u oo u Dolloi Tynger wei da tynyap u leh ya kiwa kyrchaan ya oo iwa man kam iwa sdang ka yakhih pyrchah ya ki phareng.
U Dr. Sylvanus Lamare hei klam yong oo da ong wa da biang i thoh i tar chaphang u Kiang Nangbah nadooh ki por ki pharæng wei da toh u booh ya u Kiang Nangbah ha ki kot puræ puthi.
Neiliang kongsan hei klam yong oo da mynjur u ya ini wei da ong u leh u yarap bha yeini lada ka NEHU leh dawa ko na ka sorkar yeini.
Da yaroh u leh ya ka Seiñraij wa da ye ko u pynman ya kani ka sngi kynmoo warom nadooh u snem 1994.
Ha kani ka sngi da saam leh ya ki khusnaam cha kiwa jop ha ki yakop waphær waphær wa pynman da ka Khynroo Khyllood Committee waka Women’s Welfare Committee ka Seiñraij Jowai.
Discussion about this post