Tura: U Dr. Mukul Sangma ynne ka sngi da booh mooyurim u wow chna ya ka Tura Medical College ha ka yalang wa pynman ha Tura Civil Hospital, hei emlang u montri ka Sports & Youth Affairs, u Zenith Sangma ki MLA kam u Noverfield Marak, ka Dikkanchi D.S hira, ka Bluebell R. Sangma wa kiwi kiwi.
Ka Tura Medical College toh ka thaw puræ wow em 100 tylli ki seat wei daw chna ya ka ha i thaw wa heh kamwa 100 acre ha Doldegre, iwa jngai kamwa 8 km na Tura. Kani ka thaw daw chna ya ka hei lut wa kynjoh palat T. 180 Klur i wow kynthup ya ka College ha Doldegre wei wow pynku kyrdan ya ka Tura Civil Hospital, heiwa u Dr. Mukul da ong u wa daw man ko kam ka “Teaching Hospital”.
Ka kreh ha kani ka thaw da sah ko la kamwa san snem neibhah wa ka thaw wa nyngkong wa em ha Jewilgre wa Balalgre A’king hajan ka Damalgre, ym em u pdiang ya ka da ka Empowered Committee neibhah wa katkam ki kyndon ka Medical Council of India, ka Medical College toh u jngai ko kamwa 10 km na ka Hospital katwa kamtæ da haap kyrriah noh ya i thaw.
U Dr. Mukul hei klam da ong u wa kani ka sngi man ko kawa kmen dooh ha oo samen neibhah wa da ye u sdang u kreh ya kam kani ka thaw puræ ka wow pynbiang ya i chait i khiah hapoh ka jylla.
Chooh chooh da ong u wa deiwa em kam kani ka thaw daw pyndap pynbiang ko leh yeiwa emkaam ki khynnah puræ ka jylla wow lai puræ ha ki liang wow sumaar bru.
Da pynrap u deiwa ong wa ki paidbah ka jylla boonsien chah ktah ki ha ki kjut wa ha rukom wei haap lai ki leh cha baar jylla wow yoh i sumaar wa pura, tangwa deiwa em kani ka thaw daw pynbiang pyntoh ko ya iwa emkaam ki paidbah liang wanang.
Kiwi kiwa da klam ha kani ka sngi toh u Zenith Sangma, u DC ka West Garo Hills u Ram Singh, u Retd. Pro-Vice Chancellor, NEHU Tura Campus, Dr. Milton S. Sangma wa kiwi kiwi.
Discussion about this post