Jowai: Ka Election MLA 2018 hapoh ka jylla man ko ka Election heiwa daw yoo ya ki kyrtong wa thymme ha kiwa boon ki Constituency, wei uwi na ki toh u Nehemayah Tyngkan u wow yakhun na 4-Mowkaiaw Constituency.
I pyrtuid Nehemayah toh i pyrtuid na ka Bible iwa mut ‘wow tei wow chna yeiwa da jæd wa piah wa pra’.
Ya u Nehemayah da kha ha ka 20 Naikhynde 1984 (katni em u 32 snem i rta) wei chong sah u ha Iooksi, PO- Garampani Police Outpost, BPO, Iooksi, Elaka Raliang, – West Jaiñtia Hillls.
Da sdang u wow lai skur na Iooksi Govt. LP School, neitæ nawon ha Iooksi Presbyterian UP School wa ha Iooksi Presbyterian Secondary School neiwa pyndep u ya ka SSLC ha u snem 2002. Ya ka HSSLC da pyndep u na Kiang Nangbah Government College (KNGC), Jowai wei da pyndep won u ya ka BA (Economics) na kani ka jooh hi ka thaw puræ.
Da sdang won u wow kreh ha u snem 2008 hapoh ka Birla Sun Life Insurance, wei du hapoh ynru bnai da pynku kyrdan (Promotion) ya oo na ka kyrdan Agency Manager cha ka Business Development Manager. Ha u snem 2011 nawon da pynku kyrdan biang ya oo kam u Branch Manager wei ha u snem 2016 nawon da ieh u ya ini i kaam hadien wa da rai u wow yakhun ya ka Election MLA 2018 na 4-Mowkaiaw Constituency.
Ki kaam wa da kreh mon sñiawbha u da sdang i heiwa da ksoh u yei kaam General Secretary ka Iooksi Youth Welfare Sports Club (IYWSC) nadooh u snem 2003 hadooh 2006 wei hapyrdi kini ki snem da ye u wanrah ya ka Ambulance hapoh ka chnong, ki Doctor hapoh ka Iooksi PHC, wei dei langær da pynman ya ki Free Medical Check-up. Kani hi ka jooh ka Club hapoh i yahkhmat yong oo da pynku ko ya ki kaam yalehke Sports hapoh ka chnong.
Ha ki snem wa puræ u ha KNGC itæ nadooh u snem 2006-2008 da ksoh u yei kaam Debate & Symposium Secretary ka KNGCSU, heiwa da yakhih wow yoh ya ka bus, wow kær ya u pood u ang kani ka thaw puræ (Fencing), wow yoh ya ki principal wa pura, kiwa sikai Khasi. Da yachem wa ki heh sorkar wow pynku ya kani ka thaw puræ nadooh i yachem wa u montri ka tnat puræ puthi, ki Director Principal Secretary ka sorkar, u CE PWD Building, CE ka PHE neibhah ka um wa kiwi kiwi.
Ha ki snem 2008-2016 kamwa kreh hapoh ka Birla Sun Life Insurance da uiñ u kylleiñ ki thaw ka ri-loom Jaiñtia wow sñiawthooh yei eh i khoo ki paidbah nadooh i rep i riang, ki sarok ki luti syngkieñ, wa kiwi kiwi. Da pynsñiawthooh leh ya ki paidbah wa yachem u chaphang ki aiñ wow ye ki u yada pyn daki yaki hi wa ki hok yong ki katkam wa em ha ka riti synchaar ka ri India ya kiwa tip leh kam ki Fundamental Rights.
Kam wow pynkynmoo uni u kyrtong dei mynsien wa sñiawkhia da khat u yei jhep na Iawmusiang iwa da sah da lang da ki sngi iwa ye u ktah ya i chait i khiah ki paidbah khamtam ki khynnah skur hapoh i yahkhmat yong oo wa ki lok u da khat ya i jhep na ini i thaw.
Ha u Naitung (April) 2016 da lai e yarap u leh cha ka thaw ri khonswet yong ka NEIMA kawa em ha Sahsniang wei ha u Thohlakhmi (February) 2017 u Nehemayah da yarap pura u wow pynkhooid ya ka Iawpyngkat kawa em hapoh ka chnong Iooksi.
Neidaw wym em kiwa klam neibynta ka kaam saiñ hima ka wow man kawa khooid (Clean Politics) hapoh ri-loom Jaiñtia, u Nehemayah da klam paidbah u yeini ha ka yalang paidbah ka Campaign for Change kawa da man ha Iawmusiang ha u Naisan 2017.
Ymtoh du ini, uni u kyrtong da e yarap u leh cha kiwa boon ki seiñkur, ki Dorbar Chnong, ki seiñ kreh monsñiawbha, ki manyung wadooh wa duk wa kiwi kiwi.
Hei yaklam wa u Wyrta u Nehemayah da ong u wa i daw wa rai u wow yaleh ya kani ka Election toh wa kwah u wow wanrah yei kylla hei rukom jied kyrtong hapoh ka Constituency khlem ka poisa, ka baamdoh sñiawbha wa e ki kyrtong deiwa chakri khooid.
Da ong u wa ka ri-loom Jaiñtia toh kawa mahajon ko ha ki mar wa da e da ka Bei Rymaw, tangwa ki heh spah da pynemkaam bakla sakhiat ki ya ini waroh wei kiwa dooh nawon kiwa chah ban beiñ kiwa chah ieh cha dien.
Chooh chooh da kyntu u ya ki paidbah wow dam ki u pynchong yurim yei jied ya kiwa mihkhmat du weiwa beh ka la-ær neibhah wa u Blai da e u i stat ha u bru kammon u jied ki ya uwa mihkhmat uwa em i mynsien wow chakri ya ki paidbah deiwa khooid.
“Nga u leh O yei kaamram yong nga iwa da pynkhamkti u Blai ha nga wei ym kular O i bneiñ i khyndaw ya phi waroh.” da ong u Nehemayah.
Heijooh i por da ong u wa oo ym man u u bru wow saam scheme donhi tangwa u man u leh kam u MLA u wow thooh ya ki scheme ym du na ka sorkar jylla tangwa wot nadooh naka sorkar pyrdi.
Hei yatoh won wa ka thong ka yong oo da ong u wa kwah u wow man kam uwa mihkhmat ym du yong ka thaiñ Mowkaiaw tangwa wow kreh leh neibynta ka ri-loom Jaiñtia liang wanang nadooh i puræ puthi, i yoh khih yoh kreh, ki sarok luti wa syngkieñ, i chait i khiah wa kiwi kiwi i wow pynman ya ka ri-loom Jaiñtia ka nongmuna wow bood kiwi hapoh ka jylla ha i roi i paar.
(Sponsored Content)
Also Read: Da ki palong wa ka poisa lai e yarap u bru samen ya ka thaw ri khonswet
Also Read: Pynkhooid ka Seiñ Khynroo Khyllood ya ka Iawpyngkat
Also Read: Chimkhia ki chilok na palat chnong yow pynkhooid ya ka Iawmusiang
Also Read: Wan kyrsu thiah ka CFC ya ki paidbah ha Iawmusiang yow jied ya ki kyrtong kiwa ye u kreh
Discussion about this post