Sñiawkhia ka AJYWO yei kyrriah ka sorkar ya ka C&RD Block na Wapung cha Lumshnong

Khliehriat: Ka AJYWO Central Body da beiñ joor ko ya ka sorkar jylla hajrong wa kyrriah ko ya ka Wapung C&RD Block na Wapung cha Lumshnong du hadien kattu katni bnai wa da dep wai ya ka ha Wapung wow sdang chna ya ka ha Wapungskur.

“Ka AJYWO kmen ko wa e ka sorkar ya ka C&RD Block ya ka thaiñ Lumshnong tangwa pyrchah joor ko yei rukom wanrah yong ka sorkar ya ka roi ka paar ha ka thaiñ deiwa kyrriah ya ka Wapung C&RD Block, cha kawi tawon ka thaw du hadien 8 bnai wa wai ya ka ha Wapung. Waroh i emkaam neibynta wow chna ya ka C&RD Block ha Wapung da yoh bor na ki 2 Dorbar Chnong ka Wapungskur waka Wapungchnong. Kamjooh leh da wai paidbah moo-yurim ya kani ka Block ha ka 22 tarik u Naitung (April), 2017 wei da yoh leh ya ka Work Order wow chna ya kani ka yungkrehkaam wei da lai ko cha khmat tangwa ka sorkar won da lehke ko ya ini waroh deiwa pyndam ya ini wei da kyrriah noh ya ka cha Lumshnong.” ong u M.H. Dkhar President ka AJYWO Central Body.

U J.R. Siangshai u Vice President ka seiñ da ong u wa ka sorkar haap pynche ko cha ki paidbah wa ki Dorbar Chnong yeini wa wa neiyi i daw wa da chim ya kani ka rai wow kyrriah toh hi mo wa ka sorkar ym em pyrkhat bha ko ya ini chwa wow e cha ka Wapung namo man ko ka kaam Politics heiwa 100 tam ki chnong kiwa haap hapoh kani ka Block da dooh nong ki.

“Ka AJYWO ym poi pyrkhat ko wa ka sorkar wa katni hapoh i yahkhmat u Dr. Mukul Sangma wow leh ko kam ya ini i kaam hadooh wa da dep booh ya u moo-yurim wa da wan sakhi ki paidbah wei wow kyrriah noh ya ka ymtoh iwa pyndooh yei chaniah ki paidbah. Ki paid ka Lumshnong leh daw chaniah ki mo wa ha ki leh daw neh kani ka Block?” da kylli u M.H. Dkhar.