Shillong: Ka KSU South West Khasi Hills lyngba ka kyrwoh khubor wa phah da u Wanbok Reenborne, Executive Member wa man leh u President yong ka KSU Nongtrai Unit ka beiñ joor ko yei leh brukhloo ki chipai ka Border Security Force (BSF) kiwa da pam khiar ya ki dieñ kwai ha ki bri kwai yong ki wa chong chnong Nongtrai yow yoh ki u chna yingkieñ wow kaap cha chilliang ka wah Phlangkaruh wow lai Duty ki.
Ya ini i leh ka BSF da chem da ki tre chnong heiwa ya kini ki dieñ wa da pynlut por da ki snem wow heh wow san ki, ki BSF da yah ki da kiwa na Bangladesh wow leh ya ini i kaam kawa man iwa pyrchah leh ya ka aiñ.
Ka seiñ da beiñ joor ko ya ki BSF yeini wa leh ko iwa pynyoo leh yei laitlaan ki nong Bangla wow psiah u mih katwa ngait ki wow pynjæd pynpra ya ki bri kwai yong ki paidbah khappood.
Chooh ka seiñ da ong ko wa ki chipai ka BSF kiwa toh u yada ya ka khappood ha kani ka thaiñ da man ki kam kiwa yada ya ki baar ri yow ye u lai u wan katwa ngait hi-eh ki.
Ha iwi won i liang, ka KSU South West Khasi Hills District da beiñ joor ko ya ki bor District yong ka South West Khasi Hills District hajrong wym mano ko yei dawa yong ka seiñ kawa pyrchah yei booh yaka ktem chipai ha Mawkyrwat, South West Khasi Hills District.
Neiliang ka seiñ da dap ko dei sñiawkhia hajrong i suki ka DC ka South West Khasi Hills wot hadooh wa da kut i e por ka seiñ da kut i.
Ka seiñ da kyntu ko ya ki tre thaw wym toh u e thaw ki ya ki chipai yada khappood wow booh ya ka Battalion Headquarter hapoh ka thaiñ.
Ka seiñ da ong ko leh wa daw pynkhreh noh ko ya ka yakhih wa khor wei da kyntu ko leh ya waroh ki paidbah ka District wow mih paidbah ki wow yakhun da kawon kawon ka luti wow pyntikna wa ka Battalion Headquarter ympoi ko hapoh ka South West Khasi Hills District.
Discussion about this post