Daw pynman u Moonlight Pariat ya ka General Meeting ha ka 22 tarik wow jied ya kiwa kitkaam Election Committee

Jowai: U kyrtong ka UDP u Moonlight Pariat u wow yakhun Election naka 2-Jowai Constituency da pyntip u wa daw pynman u ya ka General Meeting ha ka 22 tarik uni u bnai ha Yung Walieh ka Dorbar Chnong Dulong, Jowai wa thymme kawa em harood ka madan Biar Dulong heipor 11 waje i sngi.

Kani ka General Meeting toh kawa pynman neibynta wow jied ya ka Election Committee yong u Moonlight Pariat ha kani ka Election MLA ka wow yaleh u.

Kamtæ da khut sñiawbha u ya waroh wow wan cha kani ka General Meeting wei da kyrmen u wa daw wan ki paidbah khlem pep khnang wa ka kaam Election MLA u man ko kawa lai bait lai ryntih chakhmat.