Jowai: Ka Synjuk ki Waheh Chnong ka Ri Jaiñtia ynne ka sngi da pynman ko ya ka yalang wei da chim ki ya ka rai wow pynche cha waroh ki 525 tylli ki chnong wa em hapoh ka ri-loom Jaiñtia yei kaamram yong ki khamtam ha kini ki por Election yow wanrah ya ka suk ka saiñ hapoh ka chnong ka thaw.
U President ka synjuk u A. Lypon da pyntip u wa katkam ka aiñ ka JHADC wa tip kam ka The Jaiñtia Hills Autonomous District (Establishment of Elaka and Village and Election, Appointment, Powers, Function and Jurisdiction of Dolloi/Sirdar and Waheh Shnong) Act, 2015 da klam che ko ya ki kaamram ki Waheh Chnong kamjooh kiwa da mana ya ki wym hoi u leh ki.
Da ong u wa katkam ka Section 31 ka aiñ da ong wa ki kaamram ki Waheh Chnong toh wow wanrah yei suk i saiñ hapoh ka chnong kiwa pynyasuk, kiwa pynbiang ya ki Certificate wow yarap ya ki paidbah wei wow pait ya kiwa pynmih i awri awra hapoh ka chnong wa kiwi kiwi.
Katkam ka Section 32 won da khang ko ya u Waheh Chnong wym hoi u leh chilliang ya kiwon kiwon kiwa chong chnong kam i beh chnong, u pait chilliang ha ka niam ka rukom, wow pyndooh Certificate ya kiwa chong chnong wa kiwi kiwi.
Da khang leh ya u Waheh Chnong u leh u iwon iwon i kaam wow dai sarom ya ka Dorbar Chnong kamjooh ya ka District Council.
Kamtæ neiliang u L.D. Lakiang uwa man uwa e buit ka seiñ da ong u wa daw thoh cha waroh ki Waheh Chnong yei rai ka synjuk wa emkaam ki Waheh Chnong u wanrah ki ya ka chongsuk chongsaiñ wei wow lai ki ha ka luti pyrdi ymtoh u muaid bor ki wei wow chah pynbiej ha kiwon kiwon ki kyrtong.
Chooh chooh da ong u wa ki Waheh Chong toh u man ki kam ki Agent ka sorkar ki wow pait wow sylli lada em wa saam poisa saam kiad cha ki paidbah heipor Election wei lada chem ki ya kam kini wow pyntip ki cha ki bor ka sorkar.
Ka synjuk da pyntip ko wa ki Waheh Chnong wa leh pyrchah ya ini waroh, ka synjuk ym bien ko u bahkhlieh ya ki.
Discussion about this post